|
لن تموت الثورة بموتك يا ابو إثار
جدل الهوية وحكاية عروبة السودان
الجبهة الثورية السودانية_ تحالف كاودا
راديو دبنقا
قائمة الشرفاء...بمنبر السودان الجديد...مناصري المحكمه الجنائيه!!
| ابحث |
| المكتبة الغنائية |
| القصص والروايات |
|
إعلانات || |
|
|||||||
| التعليمـــات | قائمة الأعضاء | التقويم | اجعل كافة المشاركات مقروءة |
 الإهداءات |
 |
|
|
أدوات الموضوع | تقييم الموضوع | طرق مشاهدة الموضوع |
04-22-2009, 10:20 AM
|
رقم المشاركة : 1 | |||||||
|
المـــك النـــمــر
في العام 1818 للميلاد قُتل الشيخ حمد ود دكين أخو محمد ود دكين زعيم الشكرية علي يد طه ود حسين و ينتمي لقبيلة الشكرية. آخر تعديل حامد يوسف يوم 04-22-2009 في 10:28 AM.
|
|||||||
|
|
04-22-2009, 10:27 AM
|
رقم المشاركة : 2 | |||||||||
|
رد: المـــك النـــمــر
واصل سردك سمح بالحيل
|
|||||||||
|
|
|
04-22-2009, 10:36 AM
|
رقم المشاركة : 3 | |||||||
|
رد: المـــك النـــمــر
أستيقظ طه من قيلولته فزعا" لما رآه في المنام .. و أنشد قائلا" أخوك يا ريا أخوك وكت الخيول يتدبكن أخوك يا ريا أخوك وكت الرماح يتشبكن أخوك جبل الثبات وكت القواسي يحبكن كمبكيت وكم قشيت دمــــــــــوع الببكن سألته رية: وراك اسود علي ما نمت هسع طيب طــه: ها بسم الله قولي أخوك طيب وشديد ..حاضر قلبو ماهو مغيب إلا الشفتو في النوم من هوايله يشيب الزول في الصحي مهضوم عليه شقاهو وإن غمض شويه تجي الهموم لاحقاهو الصف ابلبوس أنا ما بخاف لقــــــياهو ياريت الحلم في صحايا كانبلـــــــقاهو كان خير ولا شر برجاهو ما بهم بالي وحارسني الثبات من الكبار قــــــبالي وكتين هسع حسيت و شفتك سالمة قاعدة قبالي ان اتلخبت الكون تاني ماني مبالي آخر تعديل حامد يوسف يوم 04-22-2009 في 11:23 AM.
|
|||||||
|
|
|
04-22-2009, 10:51 AM
|
رقم المشاركة : 4 | |||||||
|
رد: المـــك النـــمــر
ريّه: كعب نوم النهار أمس العصير كت نايمه رأيت قدام فريقنا اشوف صقـوراً حايمه كبيرن غـار على من نـومي تبيت قـايمه صحيت مهجومه لا مفصل ولا فى قايمه طه: إنتى كمان رأيتى صقور؟ حكاية غريبة علامة" كافية ظنيت الحكاية قريبة هاك من الصحيح الما بتدخلو الريبة هذي الحله بي عينىّ أشوف تخريبة دحين يا اختى يلاك لأرض الجعلين نعيش هناك باقى حياتنا معاهم ( هنا ريّه تبكى) طه: ما بفيد البكى وكلامى احسن تنسى ريّه: كيف ما ببكى كيف..افوت مراتع انسى افقد كل شىء عزي ورجالى وجنسى تطلق فوقى ناراً عقباً تقولى أنسى ما ببكى الفريق ببكى الرُجال قَبالو شن طعم الفريق ما بيوت شُقاق وحبال خرابِن وانتو حين ما بمر بالبال إلا يقع كتالا" بعدو نلقى وبال طه: فال الخير أخير. ما شفنا شيتن جدد كل الشفنا احلام فى طريقا اتعدت قبل الليله يد لحمانا قط ما اتمدت مابنهدم شرفنا لو السماء انهدت آخر تعديل حامد يوسف يوم 04-22-2009 في 11:24 AM.
|
|||||||
|
|
|
04-22-2009, 11:19 AM
|
رقم المشاركة : 5 | |||||||
|
رد: المـــك النـــمــر
ريّه: ورينى الحلم التورك مذهول طه: اصبرى لىّ أروق عقد الفكر مبهول احكيلك شنو الشفتو والله مهــــــــول شفت الوحده شفت النار وشفت الهول احيلك تمام الشفتو ما بتغابه جاين العصير أنا وانت من الغابه سايق لي بهم قدامي بي رقابه بينّا والفريق اتولعت تقــــابه قدر ما نشوف بعيد قدّاما نلقى حريق وكت النار علت ما شفنا تانى فريق باصرنا المروق مالقينا لينا طريق تشكى من العطش واخوك يابس ريق فترتى قعدتى وانا محتار جلست وراكِ حاقب الدرقه ختيت سيفى فوق أوراكِ وقت بِعد البهم لي كسعو قمتي براكِ كسعتى وجيتى و وراك كور صقور تبراكِ تبيت بي عجل شافنى جفلن وطارن غابن من عيونى وفى اللعوت إضّارن ما غابن كتير جن يقــــدلن يتبارن قدامِـــن كبيرن عيننى وغـــارن سلّ سيف ولاقاهن اخوك يالضامرة تور غنز ام هشيم الفى المجامع دامرة سيل تلا واندفق فوقو السحابه الهامره حجر الصاقعه فرتاق الصفوف العامره بادرنى الكبير ، ديك استعدن وقفن مامهلتو طار راسو وجناحيه يرفّن طاراً ديك وكت بي ريشو رقد إتكفن ريّه: عارض ومات لي الليله يمكن عفّن طه: نحمد ربنا اليله مات عارضنا وان كان عمرو طال يا ريّه كان قارضنا يلحقو بي عجل ديش همنا المارضنا نبدا زواجنا بكرة منو البجى يعارضنا بطال البعيش فى الدنيا اصلو مناهو إن كان مالو راح غير اهلو مين يدناهو سمح الفوق اساس ابواتو تّم بناهو والزول دون قبيلةُ مناهو شن معناهو ما بنفرح بي مال ونقول كفانا ورثنا نفخر بالرجال فى الحارة يبقوا ترسنا نجمع ناسنا هيلنا من الكبار حارسنا يحضروا اهلنا فرحانين يباركوا عرسنا كل بطحانى يفرح بعرسنا مناهو ساعت جمعتهم بيتنا بنتمو بناهو عذاب عيش العزب يا ريّه مُر ضقناهو سمح الزول صبى يلد ويربى جناهو (لم تمر سنة علي وفاة والد رية فردت قائلة) ريّه : دا الأعوج ترا والشين نهاية حدّو وان شاع دا الخبر يملا الفريق لآحدو يقولو أب كِبس من دخل ودّ احدّو فرحوا وعرسوا لا موجِعُن لا حدو ان كان فى الفريق ماتت مرّية ذليلة للحول يرفعوا العرس الدخلتو الليلة خليه أب كبس راس الرجال دليلة لو كان بي قبيله تعدو تبقى قليلة خليهو الكلام وعرسنا في دا الحال من بالك أمرقُو محال والف محال على ميتت أبوى لي الليله حول ما حال نصبح بكرة ونسه ونشوف بشاتن حال طه: الموت مو شمت غاية البفوت والببرو والحد والحزن ما جابو زول من قبرو الزول فى الشدايد اولي يلزم صبرو يترجّي الكريم مولاه كسرو يجبرو بنخاتر منو الوجعه هيلنا برانا نحن اهل المصاب الناس عزا مجابرانا فى آخر المراح دايما تجى الفترانا عات الحد ندوسه الناس عقب تبرانا ريّه : الناس بالمكارم والفعال تتباها وينشأ الزول فطرتو حسب مرباهو عادت جِدوُ عادتو ونحل أباه نباهو يلبس توب قبيلتو ان دارو ولا اباهو من الليلة حول مضيهو تانى اتكلم الدايرو بيتم رب العباد ان سلم طه: تانى انا أقضى حول وانا بالحسار أتالم علىّ حكمك صعب أنا قابلو ما بتظلّم لكن مشيتو للسنه قاسيه وصعيبة علينا ريّه: تمّ الاتفاق من الكلام خلينا زي عادت البلد لازدنا لا قلينا إنشاء الله السنه بي خيرا عايده علينا يا طه البهم قارب رجوع سراحو بنات واولاد هديلك ناس فريقنا الراحو نصيحة سمعتها من الكبار الراحو قالوا العربي ما بنعزّ كان ما مراحو وتقوم ريا فايته علي الفريق وطه يعاين فيهاوهي ماشه ويقول ياريت السعادة ان كان بقت ايديه كنت اعيش هني في الدنيابالزنديه علي حكموا ناسي الفي اخذوا الديه الموت بالعطش والمويه بين ايديا رية عليّ قاسية و جايرة في التفنين اه يا رب ارحم صبري امسي ضنين يمحق دي السنه ربي الحليم حنين يخصما من حياتي رضيت بعشرة سنين آخر تعديل حامد يوسف يوم 04-22-2009 في 11:30 AM.
|
|||||||
|
|
|
04-22-2009, 12:22 PM
|
رقم المشاركة : 6 | |||||||
|
رد: المـــك النـــمــر
خرجت رية للمراح و في طريقها قابلها خمسة اعراب يركبون ابلهم أحد هؤلاء الشيخ حمد ود دكين فارس الشكرية. أحد الاعراب بالضيفان تمري لاسلام لاكلام؟ صدقوا اهل المثل توب العرب صح لام رية : حبابكم عشرة من دون كشرة والف سلام يا وجوه العرب المتلي ما بتلام انا بت الرجال اهل الدرق والسيف بت الما بهموا بي حساب الخريف و الصيف بت البحقبو المرقوب يكرموا لضيف انا رية كان شفتكم افوتكم كيف؟ العربي : من وين في الاهل كفاك فخر يا بنية ريا : انا بت البيوت المن بعيد معنيه بى فوق السما نفوسنا وبيوتنا حنيه انا بت ابكِبس في النسبه بطحانيه ود دكين: آآآآ. عبد الله ابكبس؟ عز البطانه وفخري في راس العرب بنعدو ماهو الوخري كريم وهميم كان للقبائل دخري بت شيخ العرب هيلك صحيح تفتخري توقد نارو ديمة الما بكوس الجمرة وفي الضيفان يهوش سكينو دايماً حمرة بي كاس ما عبر لبنو بيجيك بالعمرة هيلوالشكرة هيلو الريسة هيلو الامرا المرحوم ابوك كان للقبيلة غطاها عزك قديم عمك حسين ابو طه ان شاء الله يكون اخوك دي السكه ما تخطاها ريا: كان ما يسد مكانهم قدموا ليش يوطاها لا يفوت ..لا يموت الساحتو يوت مغشيه تقابة الفريق يوقدا صباح وعشيه زايد في الرجال طالق قفاي ووشيه ضيوف الليل يكفيهم مرارة و شيه دكين : ما دخل التراب البركه في الذريه والخلاك وراه ما بقولوا مات يا ريه دايما في القبائل سيرة ابوك مطريه بيكي وبي اخوك تزيد ودي المحريه العربي: ما بتسألي لامن وين ولا وين ترسو ريا : كيف العربي يسأل ضيفو كيفن تنسوا أول بكرموا ويخابروا ساعة أُنـسوا من مقلب حديث تعرف أبوه وجنسوا العربي : عملتي حسابو ضيفك وكرموا وجّبتي يخجل كان سألتي وإسمو ما عرفتي إسم شيخ العرب سامعابو ما شفتي ده خريف البطانه المالوا فيها مشارك هيلوا السارحه هيلوا الصاهله هيلوا البارك ما وقع لك كلامي ساكته لي شنو خبارك فخرك ود دكين جاك في فريقك زارك ريا : اهلا حباب العز وماهو الفايه اب ناراً بتوقد للضيوف دفايه بي شيخ العرب الإفتخار ما كفايه تابعو إن جانا.. نفخربو ونخدموا حفايه ود دكين : بارك ربي فيك عقلك يدوم يا رية وكرمك ماهو كلفه دي طبعتك فطرية إياك بت التلوب والسمته فيك محرية قديم فوت البطاحين عِزة للشكريه |
|||||||
|
|
|
04-22-2009, 12:42 PM
|
رقم المشاركة : 7 | |||||||
|
رد: المـــك النـــمــر
يأتي طه و يرحب بشيخ العرب طه: حباب شيخ العرب مرحب خريفنا الزارنا مرحبتين حبابك اتشرفنبوا ديارنا حباب راس العرب البيهو كل مدرنا تنزلوا في الدرب مالنا ماتت نارنا؟ شيخ العرب: حباب طه الضرس الفي الصهيباب راس الجود والكرم هيلك قديم ميراث نارك ما بتموت يا ولدة الفراس قاصدين ام شديدة ومعانا عوجه راس طه : لعدوك العوج يا الفي الكبس سراي راسك ما بدوس مليان رجاله وراي باكر لي ام شديدة بركب معاك براي يا شيخ العرب لكن تختوا كراى ود دكين : هادي الشورة يا طه الغلبني دليله كل الابذلها القاها فيك قليله طه: كراي الدايروا تبقوا ضيوفي انتو الليلة ترقدوا في الفريق حتي ان عشانا بليله ود دكين : مسكنا الدرب أسرع قوام ما تلعب دارك ديما عامر والسمح ما بكعب يكفينا الوصف لاتشد جمل لاتتعب وهدنا الطريق عقب الوصول ما بصعب طه: يمين تغشوا الفريقبتفوتوا نحنا مقابر؟ ود دكين : عامر انشاء الله عامر ياكا مرسى العابر مشطوطين خلاص مسكنا في دريب جابر نخاف عوج الطريق منو اللي المقدر خابر؟ طه : دريب جابر مزم والسكه سالكه ورايقه فرقان ما بتلاقيك ما بتعوقك عايقه اخد خاترنا نحنا وواصل السايقه بتتراوح ام شديدة باكر زواملك فايقه ود دكين : الزول ان وعد شين كان ميعادو يخلفو وفي ربط اللسان يسخابو دمو يتلفو سفري الليله زولين فيه مابختلفو ضروري اصل ام شديدة علي وعد بي حلفو ما بعرف ازوغ من نشيت تبيت فريقكم لي فريق وبيتكم يمين لي بيت اجيك ديناً علي حتي إن بقيت حبيت هاك وعداُ نجيض ارجانا بكره مبيت شوفتي للفريق ايام بكي ابواتك ما غابني حالك وسمعت بي نخواتك فريقك بكره ضيفوا وما بفوتوا وحاتك إلا أحققك وبراياشوف نفحاتك يا ود الهميم النفسوا ما معارضاهو كرم الضيف عليك مكانة ابوك فارضاهو جاييك في امر ان تابا وان ترضاهو غيرك ما بكوس واملي بس تقضاهو طه : غرضك مقضي ان احتاج لخيل وجمال والضان والابل سارح يمين وشمال ود دكين : فوق القلتو انا لي فيك آمال طه: بي دمي الغرض بقضاهو خلي المال شيخ العرب : دي الماموله فيك وين الدرب خترنا طه : دربكم في السلم ود دكين: والله تب ما ودرنا بكره نجيك ان قلينا ولا كترنا آخر تعديل حامد يوسف يوم 04-23-2009 في 04:19 AM.
|
|||||||
|
|
|
04-22-2009, 01:41 PM
|
رقم المشاركة : 8 | |||||||||
|
رد: المـــك النـــمــر
واصل يا حامد يا اخى واصل نحن متابعين وبشده كمان
|
|||||||||
|
|
|
04-22-2009, 02:30 PM
|
رقم المشاركة : 9 | |||||||||
|
رد: المـــك النـــمــر
|
|||||||||
|
|
|
04-23-2009, 04:03 AM
|
رقم المشاركة : 10 | |||||||
|
رد: المـــك النـــمــر
ألاعزاء |
|||||||
|
|
|
04-23-2009, 04:36 AM
|
رقم المشاركة : 11 | |||||||
|
رد: المـــك النـــمــر
واصل شيخ العرب حمد ود دكين سفره الي أم شديدة علي ان يرجع في اليوم التالي ليطلب من طه ذلكم الغرض. في صبيحة اليوم التالي يجلس طه مع بنت عمه و يقول لها طه: في البال لي ضمير شيخ العرب متعوب قايم نفسه يختف في الكلام مرعوب الراجل زمان كان ضحوك و لعوب مو خاتيلوا شئ ما شفتي كيف مرعوب؟ حمد ود دكين مرتع دياروا وربعوا دا الشئ السمعتوا من الاباء والتبعوا الراجل فاعيلوا يبين لك طبعوا وانا ودالخلا البعرف اسوده وضبعو ردت عليه ريا : اعوج كان يخلف الليله ميعاد جيتو رجال وحريم كل اهل الفريق في رجيتو قطعوا السارحه كل زول في مراحو سعيتو كبار وصغار و حتي الراعي خلا رعيتو طه : محال يخلف محال.. قال جايبو غرضاً عندي ريا : كان غرضاُ صعب ؟؟؟؟؟ طه : كان رأس نمر في شندي وعدتوا أقضاه وابذل كل جهدي العندي كان بالمال وكان بالراى وكان بي زندي ريا : هيلك من قديم انت البجيك تحجالوا لاكين ود دكين عامر بدين بي رجالو طه : يا ريا الكلام ده اخير تقفلي مجالو وكت اوعدته بقضالو غرضو الجالو في هذه الاثناء يدخل ثلاثه من ابناء البطاحين وهم عبدالله وخلف الله وأحمد عبد الله :سلام يا طه طه : مرحب بي كبار قبيلتي وعزي مرحب بالاسود البفقعوا المستهزي ريا..جات قبيلتك فوقا انكعى هزي وإن زحينا يوم الحارة قرنك جزي ريا : اولاد بطحان تعيشوا ويزيد مراحكم ناير وناركم في سرات الوادي تهدي الحاير بتحلو المضيق وتصدوا غارة الغاير ما هيلكم تزحوا ان كان يزح الداير بعد كلام ريا القوي اهتز خلف الله و هاش فناداه عبدالله قائلا" : خلف الله ولدي اقعد قبالة عمك كلام ريا هادا بشوفو غير دمك من زمن بعيد متمني أسمع نمك فرج همنا مولاي يفرج همك دوبينا ......قول ... دوبي خلف الله : يدوبي و يقول الولد البخاف من القبيلة تلومو بخلف ساقوا فوق تيساً رقيق قدومو اما يجيب رضوة البهم البنقر فومو وإما اتقادحن قدح الرماد حرومو سنابك حضر الطافه و جرايدك نوا كورك سال و مزيقا و رطانه و عوا الخلاني فوق نار أم لهيب أتلوا النوم شفتو ياقرد القلوع شن سوا؟ أكل الشلخه لامن كمل المنسية شمخ الحورى لي فوتة عريب بت ريا كان ما أسِكت الباكيات و أخلف الكيه قولة أبوفاطنة يا الصادق خساره عليا خرير دوماتو فوق عاجن رسن متلاقيه يا الغول النقيب سويلو سوق الساقيه بت معز الخلا الفوق الكجر متاقيه عكرناها يا أمروبه النشوف الباقيه |
|||||||
|
|
|
04-23-2009, 04:46 AM
|
رقم المشاركة : 12 | |||||||||
|
رد: المـــك النـــمــر
حامد
|
|||||||||
|
|
|
04-23-2009, 05:24 AM
|
رقم المشاركة : 13 | |||
|
رد: المـــك النـــمــر
الحبيب حامد ود يوسف |
|||
|
|
|
04-23-2009, 05:30 AM
|
رقم المشاركة : 14 | |||||||
|
رد: المـــك النـــمــر
يظهر من علي البعد الشيخ ود دكين في جماعته قادمين من ام شديدة طه : هداك ود دكين بي زملو بان شفناه دار اليوم يروح خلف الوعد خفناه الراجل في الوصول ما خاتي لي معناه يا ريا استعدي الزول جمعنا عناه وصل ود دكين قائلا" : أولاد بطحان سلام اهل النباه و الشكره سلام عز العرب اهل الفحل والبكره سلام يا طه يا راس الكرم والضكره جيت لي غرضي يا طيب الاصل والذكره طه : مرحبتين حباب مرحب خريف الرازه حباب شيخ العرب البيه القبائل عازه حباب سيف النصر البيه هاشه وهازه في يمنك قبيلتاً ما بتقبل فازه عبد الله : هيا جايهو الزمل شيخ العرب : خليها يا عبد الله غرضي إن ما أنقضى أنا زملي ما بتدلي طه : الناس في رجاك من الصباح في مله كدي شوف الطعام شيخ العرب بسم الله شيخ العرب : ما بأكل طعام كان ما حسابي اتضرب وقضيان الغرض فيكم حقيقه مجرب الامر العنيتو الليلة كان ما ا تضرب مابنفعني اكل وما بيرويني مهما اشرب في عرف العرب اذا رفضوا الطعام يستوجب تحقيق طلبهم عبدالله: ياشيخ العرب امرك خلاص همانا قول غرضك عديل خصصنا او عمانا هسع نقضى ليك في محلنا اللمانا كان بي مالنا كان بي زادنا كان بي دمانا شيخ العرب: عندكم الغرض لا بدور قلم لا ورقه وماغرضاً تسافرو لو وتقيسوا الفرقه بقضي ان قلتوا خير مابدورلو سيف لا درقه وان كان قلتوا لا.. يروح شمار في مرقه مامقبوض وجيتكم لاجي فوقي جنيه بي خيري ومراحي وتاني نفسي غنيه جاييكم نسيب تدوني بطحانيه عبدالله : خير سميها ود دكين: في بت ابكبس لي نيه عبد الله : يفتخروا البطاحين ساحتم راح بالك لكن ريا امرها مقضي من قبالك فات فيها الفوات لي طه هادا قبالك من دون ريا قول الدايروا في بالك ده فريق الصهيباب مافيهو واحده حقيره مال ورجال وعز في الحله مافي فقيره كتير زي ريا مليان البلد من غيره ان درت الكبار وان كان قصدت صغيرة شيخ العرب : إن مال الشجر مابكسرن فراعو وقمحان الطلب لي الما بجيبه ضراعو ليه يا أهلنا البيناتنا مابتراعوا القال راسي موجعني بربطولوا كراعو؟ عبد الله : حبل المهله يربط انت ارتاح بيت بكرة نمر سوا نلفي البيوت بيت بيت سمي الدايرها ولوم البقولك ابيت شيخ العرب : يمين بالله غيرالغايه مالي مبيت هنا حز الكلام في نفس طه بعد ان بينوا لشيخ العرب بان ريا مخطوبه ويصر علي الزواج بها طه : يا شيخ العرب أمرك بشوفو حقاره وما جايباك مره الجابتك بس غارة وقرناك كثير ونفسك ابيت وقاره خبرك هادا ما دايرلو دق نقاره قام واحد من اعوان شيخ العرب اسمه علي ووجه الكلام لي طه وقال : قبلك في اللجج يا طه راحو الهدو بتتجاسر علي شيخ العرب بتهدو؟ زولكم ماعقل يا كبار كان ما تهدو بي عنادوا الفريق خايف يسبب هدو توتر جو المجلس وقام طه قال : انا المالح الكارب خريفي وصيفي المتلك تبيع ما اظن يطول فوق قيفي كان ما الليله في بيتي وبعدك ضيفيفي في الشي السمعتو برد عليك بي سيفي شيخ العرب : كفي يا بطاحين فيكم اتغشينا كرمكم جانا طامح رخصه اتعشينا بعد الشى السمعنا تاني كان ما مشينا خايف في اجتماعنا تقع وقايعاً شينه في وداعة الله عقب بيناتنا ما في علاقه وات يا طه اتشفيت شبعت شلاقه عمرت الشر سعيت دليتو بي معلاقه نحن وانتو بعد الليله يوم نتلاقه قام عبد الله عاوز يرضي شيخ العرب ود دكين فقال : من ولدك زعل كل البلد بتكاورو ارحكم بيتنا بيتو ونحن زولنا نداور ونتدابر نشوف نحزم جمعنا نشاورو رد عليه شيخ العرب : اسد الغابه حالف ده الفريق مايأجاور عبدالله : سمح ارجانا يمكن طه نحن نجبروا شيخ العرب : الزول في الرقاد شقو البريحو بخبرو والزول البليد بي ايدو يحفر قبرو دحين بنسوي عوسنا وطه يلزم صبروا رد طه علي شيخ العرب بقوة و قال : سوي الدايرو وكتر الكلام خليهو والشر القصدتو معاي ابقي عليهو طير اصل السماحتي القمر دليهو يوم نتلاقا كل واحد بعرف الليهو هنا خرج شيخ العرب ود دكين وعيونه يقدح منها الشرر وكبر الشر في نفس طه الذي ركض خلف شيخ العرب ليفتك به لولا ان اعترضه أحد البطاحين و أسمه أحمد قائلا" له أقيف يا طه عندي نصيحه ليك ابداها العقده الصعيبه العاقل بتعداها الشكريه كثره نحن ما نلداها انا عندي العرب بي ريا أخير نفداها طه : دا الراي السديد يا احمد تراك بي فكرك روح لي ود دكين وريهو يسمع شكرك يديك مال كتير وقبيلتو ترفع ذكرك تصبح عمدة فوق روسينا تخلف حكرك تدخل عبدالله فقال : ليه أحمد تهينوا؟ نصيحتوا ما ضاراك ما حق النقص وانت بتعرفوا براك وكت بتسوي عوسك وما بتشوف بي وراك نشاور ريا يمكن ريا ما دايراك طه : صدق القالوا خربانا البلد بي كبارا هديك ريا أسألوها واعرفوا خبارا من غير السفر ما عندي تاني دبارا نحن وانتو بي دي الحالة ما بنتبارا أحمد : يا طه المصاعب للقبيله تقودا مسافر وين مخلى النار وراك ميقودا؟ طه: انا السمتان جليس الردفولا عقوده حد السيف بقطع عقدتو المعقوده ما ولعت ناراً انتو تقعو فيها شن دايرين براى انا نارى متدفيها أحلف ليك يمين دى الحله متقفيها باكرمن صباحى قبال يحس الفيها عبدالله : نحن كبار اخيرلك ترضي بي عرفتنا مع الشكرية احسن نشترى الفتنا ندى ود دكين ريا ونكتل الفتنا مامن خوف ملاقات الرجال حرفتنا طه : من الفيها ما بزح ان تزحزح مره وان حيين نعود ان طال زمنا ومره عيش الدنيا ان كان يحلى وان كان مره الزين ما بدوم والزول بموت فد مره عبدالله : وقت صممت ما ترجع وتسمع قولنا وسفرك دا المحال ما بقبلنو عقولنا الموت ما بنخافو الخوف يمين مُوهولنا بنعاين بعيد ونخاف بهادل عونا الشكرية بي سيوفن صغيرنا معتق ما بنابا الكتال ونقول جرحنا اتفتق مرحبتين حباب الشر محل ما بتق تنقد الرهيفه انشاء الله ما تتلتق طه: الشكريه غوش واكتر علينا حساب ضيف ليهم لميم ما بتربطو الانساب انا لي غارتن حسبت الف حساب كان تتعدوا راي يقين عقابكم ساب بجيكم حمد ومعاه الرجال تابعاهو قولو ليهو طه طفش وريا معاهو كيف نرعي السفيه الادبو ما بيرعاهو يرفض طلبك انت ونحن كيف نسعاه ابقي قاصدو وحدي والقبيلة محايدة عقبان ان رجع فوقو الخسائر عايدة وان كان دارني مابترجع جموعو الزايدة وان حصلني حت ما اظن يعود بي فايدة عبدالله : ما بقيف ود دكين واصلوالسرج ملحوق في دربك بسوق يا طه ياك ملحوق وات صنديد تصد الميه ماك ممحوق بنخاف كترتن وايد الرجال بتحوق طه: ليه خايفين علي؟؟ الدنيا عيشا مخاطر الواجب نسوي ونرجي ستر الساتر في وداعه الكريم الليله انا نيتي خاتر يا دار ريا ما كان الفراق بالخاتر كفايه مع السلامه انتهينا خلاص غيرالشوره دي ما لينا تاني خلاص في يميني ابحريره الدكري القصاص ما بخاف ود دكين ان جاني بي رصاص يخرج طه من المجلس ويحاول احمد ان يوقفه فلا يلتفت اليه احمد: عم عبدالله خبرك هادا شيتن فاجع كيف بنطاوعو من بيناتنا يطفش ناجع عبد الله : سمعتوا كلامو من الفيها مامتراجع في الشئ الشايفه قط بي هينه ما بعود راجع احمد: نركب نلحقه نخليه يمشي براه ؟؟؟ عبد الله: شورتو القالا اخير من نلحقوونبراه العاقل بحسسب لي التجي متافراه ويفكر علي القدامو والبي وراه احمد: فوقو بسوقو قط في ظني ما بخلوهو كيف موقفنا ساعه يلحقو يكتلوهو ؟؟ عبد الله : ان وقع القدر ما بتقدرواتصدوهوا ما وكت الكلام هسع اخير قلوه وينفض المجلس آخر تعديل حامد يوسف يوم 04-23-2009 في 07:49 AM.
|
|||||||
|
|
|
04-23-2009, 06:48 AM
|
رقم المشاركة : 15 | |||||||
|
رد: المـــك النـــمــر
الفاضل. حامد يوسف |
|||||||
|
|
|
04-23-2009, 07:48 AM
|
رقم المشاركة : 16 | ||||||||||||||||||||||||||||||
|
رد: المـــك النـــمــر
تسلم يا حبيب و امتعك الله بالصحة و العافية تابع معانا فالقصة جميلة جدا" |
||||||||||||||||||||||||||||||
|
|
|
04-23-2009, 07:53 AM
|
رقم المشاركة : 17 | ||||||||||||||||||||||||||||||
|
رد: المـــك النـــمــر
تسلم كتير أخونا أبوأحمد و فعلا" القصة تحاكي صمود عنتر و حبه لعبلة و الذود عنها بالنفس. هذا التراث و غيره كثير يجب ان يعلمه الجميع حتي يفخروا بآبائهم و أجدادهم. يا حليل زمن الحُجا فأذكر زمان نرقد بجانب حبوبتي انا و اخوتي و ابناء عمي و يكون العنقريب فيه قرابة السبعة اشخاص و الآخرين في العناقريب بالجوار لتحكي لنا قصص أجدادنا الآن بناتي مع سبيستون و غيرهم جل ابناء السودان. |
||||||||||||||||||||||||||||||
|
|
|
04-23-2009, 08:13 AM
|
رقم المشاركة : 18 | |||||||||
|
رد: المـــك النـــمــر
والله يا حامد طبعتها عديييل كده وشغال داير احفظا
|
|||||||||
|
|
|
04-23-2009, 08:14 AM
|
رقم المشاركة : 19 | |||||||
|
رد: المـــك النـــمــر
الان وفي الخلاء يتوجه طه مع بنت عمه قاصدين شندي ليحكوا للمك نمر ما صدر من نسيبه و يطلبون الحماية في الطريق طه يهمهم بكلمات و يقول درقي يكركب كمه ركبي يشيل دي الهمه اصلي بطرز رمه مني تحود الامه جملي يكسر الهربه سيفي يحل من كربه قلبي سمينا تربه ما بتقماني الغربه يا ريا الحلم ما شفتي كيف اتهول واتفسر براهو وبالشين علينا اتاول داخل راسي فكرا انا منو ما بتحول بكتلو ود دكين ان كان قرب وان طول ريا: اسود ود دكين بي اسمه ما تحجينا هو الفرقنا قمنا من البلد هجينا عقب في دار جعل تاني الخرابه بجينا؟ مابسوي الرماد المك نمر بحجينا ريا: ماك شايف الدرب؟ طه : ماشيهو بي كرعيه تلاته اياموضحوه وكان معاي سعيه هسع مشينا يومين لا فتقه لا في رعيه كيف يلحقنا دون شندي ومعاه معيه ؟؟ قبيله دار جعل محميه فيها اسودا تقدلبالمكارم ديمه فاجعه حسودا راس المك نمر كل القبيله يسودا ركازة القبايل في السنين السودا بكره نجيهو ابسيفا يجز بولادو العزوالكرم من الكبار تيلادو ما اظن ود وكين بي شينا يوطي بلادو ماخد بت اخوهو شمه ام اولادو ان ودعتك المك ما بخاف المتلو اهون منشراب المويه عندي اكتلو وارجع للبطاحين تاني راينا نفتلو والشكريه تغيو غيرحرب ما بتلو يا ريه البطاحين اصبحت محقوره علي الشكريه دايما سارحتن معقوره ما بتلقالا عز وتعيد مكانه وقوره الا تلعب الغاره وتغدي صقوره ريا: في دار الشديد ابقالنا قوم دربنا بي وصفك دحين من شندي نحنا قربنا ما بنفتق عشا بالفتقه دي تسربنا مابنومو الرجال يمكن يمسكو دربنا هنا يسمع طه حركه خيول قادمه فيقول لي ريا: بسمع حركه ريا: شد ديل يبقي رعاويه طه: حركه صهب ده ركب سروج ما حويه قربت مننا وفي ظني ناسا شويه كان ناس فزع ما بجيبو حته ضويه ريا: ياهم ناسنا خمسه عقاب رجالن وينو؟ ما بتشوف ود دكين برز براهو هوينو طه : الشي البينا نحن سعينا لي تهوينو ضايقنا اب فعج ما ظن يعود لي عوينو الناس المعاه عرب صعيد يا ريا ما اولاد عمو ديل والله ما شكريه معروفين تمام في كل بلد اجريه كان حفرولو بير ولقوهو شجره ضريه الجاينها بحكيها ليك اجمال قايمين من هناك بارنو بي آمال عارفين ود دكين ما بهم بي خيل وجمال بكتلني ويسوقك وهم يسوقوا المال وان مات ود دكين ودي الظانها في فكرى بتشوفي الفضائح الما بتجيك من شكري الشكريه فرسان ومستحقين شكري دا الصح قلتو ليك انا لا بخاف لا مكري ريا : يا طه استعد الناس عنونا عديل طه : وين شفتي القطابي مسوي همو قديل بضاير العوق اخوك الما بهم من ديل براك بتشوفي ياما اشبعهم بهديل وهنا يلتقي الفارسين يواجههم طه بصدره و خلفه بنت عمه و ود دكين بالمقابل و خلفه من معه شيخ العرب: اتعبت الزمل حفيت وراك متسبقه احسن ليك تفوت ريا وتحل الربقه طه: كان كل القبائل جات علي منطبقه افوت من ريا يا شيخ العرب؟؟ ما بتبقا ود دكين: البلقي القبائل ما بسوي سواتك خربت قدلتك يا طه وين دعواتك تاني بعد جريك البشهدنبو اخواتك فارقك الثبات فارق درب ابواتك طه : يا شيخ العرب جربت لحسه كوعك ؟؟؟؟ كل ما اوقرك في الشين اراك تتقدم اتعكنن خلاص انا صبري حصنو اتهدم اصلو البينا ما بتنفك من غير دم الكاينه التكون بي وراها ما في ندم قام واحد من جماعة شيخ العرب وإسمه عمر للنيل من طه فيقول : عمر : اصلو الخمله ما بسمع نصيحة الهادي اول خفنا ليك من البهادل هادي يا طه البهدد ما بضرب الوادي يمشو عليه الرجال يجري ويقبل غادي طه : هسع تشوفو ان كان صح وكان تهديد وصلتو الميس ده حين .. وحديد يلاقي حديد بنبرش الطروره ويثبت الصنديد خليهو المضي لاقي البجيك جديد عمـر : نافذ فيك قدر يا طه انت عميتَة في الهروب وقعت .. عترت ما سميتَة منه وجاي قضيت وبقيت خلاص زول ميتة في تركتك كفاي انا بركب اب سوميته ( ابو سوميته ده الجمل بتاع طه ) طه : الداير الغني يعمل حساب لي فقرو كعب الضله كيف المتلي انته تحقرو ؟؟؟ ابسوميته خلي الليله سيدكم اعقرو وين تاني الملاج وكتين يتلب صقرو ود دكين : لم باقي الكلام يا طه بهمك سرب جيتك استعد طه : مرحب حبابك اقرب من قومة الجهل انا لي لقاك متدب يا شيخ العرب الليله نجمك غرب وهنا تقع معركه عظيمه بين الفارسين والباقين وبعد ساعه من القتال يسقط شيخ العرب ود دكين ميتا بين يدي طه : طه : تري شيخ العرب قبض الربح من تجرو اتوسد تقيله انشاء الله ثابت اجرو وانتو الشوره كيف .. عندي الزمل بتحجرو صنقعو .. ده السماء .. بتطيرو ولا بتجرو ؟؟؟ أحمد لي عمر وقد طار قلبه : ابرز ياعمر الروح في ايد الخالق بتجابه الضرب في الدرقه ساسك غالق عمر : عان ده الخشيم دايما تنط متشالق ما تنزل عليه ... ات ماك بالغ طه : ضربي صعيب علي وصف البوصف عازر في غارب التلوب انا نايبي دايما غارز اسمعو يا طمش كان ما يجيني مبارز واحد منكم بضرب طرف ما فارز تري ابسوميته اركب يا عمر سافرته قبيل وقت الكلام زي الاسد طفرته مال دمك بهت متل التقول جفرته؟ عمر وقد ارتعدت فرائصه: من القلتو ليك انا تبت واستغفرته طه : انا علي حلف ان كان بقيتو سريه منكم انتهي قبال تجي العصريه جيتكم استعدوا تاني ما فيش ريه هجم عليهم طه لفما كان منهم الا الاختباء خلف ريا و يرددون : هاديل السيوف واقعين وراك يا ريا طه : يا خضرة المفرهدة فوق جروفا نديه علي الواقع وراك انا كيف اشيل ايديه حتي كان كتلني عافي ليه الديه دمي ومالي هيلك واقبليه هديه ريا : رجال التابه ... انتو الستره تبما فالكم اتامنتوا قوموا وامشوا سوقوا جمالكم حت مال ود دكين سوقوهو يتبع مالكم نمشي في حالنا نحن وانتوا امشوا في حالكم طه : زايله رقد دكين اسد القبيله الراعي كان ما ضايقني هو .. ما كت قطعتو ضراعي ريا : تتاسف له ليه كان دار يجز براعي والنعلات حرام ما تضوقه تاني كراعي طه : موت المتلو نقصان للعرب في الجمله كان راس الجرارق وهو البقود الحمله اطرا فعايلو جفني يجف بعد ما يمله كان ما شويه كان داير يعمل العمله وتوجها الي شندي حيث المك نمر .. يصل طه الى شندي و يدخل على المك نمر في مجلسه يحيط به رهط من القوم |
|||||||
|
|
|
04-23-2009, 08:18 AM
|
رقم المشاركة : 20 | ||||||||||||||||||||||||||||||||
|
رد: المـــك النـــمــر
دى المداخلة كتبتها قبل مداخلتك الاخيرة واصل يا حبيب واصل السرد الجميل
آخر تعديل محمد السيالى يوم 04-23-2009 في 08:20 AM.
|
||||||||||||||||||||||||||||||||
|
|
|
04-23-2009, 08:27 AM
|
رقم المشاركة : 21 | |||||||||
|
رد: المـــك النـــمــر
هاديل السيوف واقعين وراك يا ريا
آخر تعديل محمد السيالى يوم 04-23-2009 في 08:30 AM.
|
|||||||||
|
|
|
04-23-2009, 09:28 AM
|
رقم المشاركة : 22 | |||||||
|
رد: المـــك النـــمــر
السيالي يا حبيب عارفك هسع تكون هايش و حالتك صعبة طبعا" ابراهيم العبادي اتقطع في المسرحية دي و قدر نسجها من قصة تُحكي في الاسمار الي قصة شعرية تؤكد فحولته اللغوية و تؤرخ لتاريخ مجيد. |
|||||||
|
|
|
04-23-2009, 09:51 AM
|
رقم المشاركة : 23 | ||||||||||||||||||||||||||||
|
رد: المـــك النـــمــر
لا والله انا حارقنى كلام ناس لا حاربو الناس ديل ولا سمعنا بمقاومة فى ديارهم يجو يتفاصحو هنا ده على المك الذين يجب ان يتناقشو هنا ده هم هولاء الذين قاومو التقى الغزاة مع جيش المقدوم مسلم والي كردفان الذي عينه السلطان محمد الفضل، فاندفع جيش الأخير لا يظن سوى النصر (كما فعل الشايقية من قبل) لكنهم تفاجئوا بسقوط الجنود بالرصاص فعلموا أنه لا قبل لهم بعدوهم وهم يحملون السيوف والرماح. وهكذا انتهت واقعة بارة بانهزام الوطنيين وانتصار الغزاة فسقطت كردفان في يد الدفتردار قبل سقوط سنار في يد إسماعيل. لم يحاول السلطان المقاومة بل نزح إلى الفاشر ينتظر تطورات الموقف. لم يسر الدفتردار أبعد من الأبيّض لندرة المياه في تلك المناطق فأعلن محمد علي باشا عدم رغبته في فتح دارفور بل فكر في إخلاء كردفان والتنازل لأحد الملوك ليدفع الجزية إلا أن الدفتردار أقنعه بالعدول فعدل عن ذلك في 1822م. يعنى بالواضح كده لم يقابل جيش إسماعيل أية عقبة حتى وصل الديار الشايقية.. سار الجيش متجها نحو سنار عاصمة مملكة الفونج فأرسل إسماعيل إلى الوزير محمد ود عدلان الذين كان ممسكاً بزمام الحكم بدلاً من السلطان بادي السادس. وطلب إسماعيل باشا الولاء للخليفة العثماني فكتب له ود عدلان رسالته المشهورة: "لا يغرنك انتصارك على الجعليين والشايقية، فنحن هنا الملوك وهم الرعية. أما علمت بأن سنار محروسة محمية، بصوارم قواطع هندية، وجياد جرد أدهمية، ورجال صابرين على القتال بكرة وعشية" هذا يدل على من الذى قاوم الاستعمار الجديد ومن الذى كان يحكم فى تلك الفترة السودان وجاى ليك راجع يا حامد واصل فى السرد الجميل أنا منتظر ديل عقود دهب والله عقارب
آخر تعديل محمد السيالى يوم 04-23-2009 في 09:55 AM.
|
||||||||||||||||||||||||||||
|
|
|
04-23-2009, 09:52 AM
|
رقم المشاركة : 24 | |||||||
|
رد: المـــك النـــمــر
طه : التلب اللزوم مدخور يشيل العايلة يقدل بى مهل فوقه الحمولة الهايلة اياك مرق القبايل فيك نسند المايلة فراج كربة الهم اب قبايلا جايلة عامر جمعكم انشاء الله ما ينفضة ما جابنى مال ما بدور دهب لا فضة بدور المك نمر سيد النحاس الجضة جيتو على حملة" غيرو ما بتنجض المك نمر : تقضى كان بقدرها طه : انت اللزوم ماك حاشى الاف زي حزمتى تشيلها تقدل ماشى التقيان تفشو والضعيف بتراشى ماك داب قبيلتك نحن بيك نفاشى جيت يا مك واملى فيك تكشف همى فى الاول وداعتك و فى حماك بت عمى وكتين تقبلها تكون شلت تلتين همى و التلت الاخير تحجانى تحقن دمى بت عمى اب كبس ما كان ابوها فقير ابوي قبالو مات وربانى كنت صغير وكت لحق عش وراهو مانى حقير اصد الغاره على جاري و لى عروضى اغير المك نمر : مالك هسى شن جاك طه : جاتنى جنية حربة ربى ما بى خاطري ما بالنية المك نمر : كتلت منو وجريت ؟ طه لبنت عمه: اها تسمعي يا بنيّة ؟ دي المابيها لكن خفت ورانية الموت ما بخافو الخوف يمين مو هولى الشئ البخافو بخاف بهادل عولى كان الناس الوراي براي يسعو لى فى راس الكتلتو اقيف يمين لا حولى كان هم برضو بى تارهم و ياخدو الهيلتى ما كنت التجيت ضاقت على مهيلتى يامك ناسى قلة بخاف يخربو قبيلتى بى جعل احتميت فوقك سندت تقيلتى الشكرية تقيو و للجوار ما براعو حمد ود دكين فى راسى خت كراعو سمع بى سفري قاصد شندي قام بسراعو قاطع دربى يخرت ريا قال بى ضراعو جيت من اهلى قاصدك ما بقبل تار انكشف الامر دحين براك اختار يا اما تبقى بينى والبخافو ستار ولا تكتلنى انت نسيبو و تاخد التار اياك عز القبايل و الكرم فيك طبعه و جارك ما بهم ان كان مسوي السبعة ان كان اجلى تم اخد قصاصى التبعه و الياكلو الاسد اخير لومن الضبعة يلتفت المك نمر للجعليين من حوله و يقول : مطارق جعل انتو الكلام سامعنو قولوا دحين رايكم وفكركم الشارعنو يهب احد الجعليين واقفا : كان ضيفنا مانحجاه ندافع عنو نرمى سيوفنا ليه تانى الحصان ساعينو قديم يا مك ديارنا مرتع الامال و شعبة الكون وركازة الزمان ان مال صغيرنا ان جال يضاير العوق يمين وشمال بدمانا النزيل نحجاه قبل المال اديهو الامان يقدل و يلقى مناهو والبقى فوق امان المك منو البدناهو كل اسم جعلى من اعلاهو لى ادناهو محال يبعد والمك نمر ادناهو المك نمر : انتو كبارنا شورتكم جمعنا بتعمرو مارستو الدهر ضايقين حناضلو و تمرو غاية الحى فناه الموت نهاية امرو لكن بى وراه ذكرو بصبح عمرو اياها الضامرة وعليها كنت مصممم اتعداها رايكم جايي ليها متمم سار فى امانى طه بالزمام متزمم و ادوهو هدومى و بعمامتى اليكون متعمعم ارتع فى امانى انا البفش البتقو يلزمنى اليمين ان ولدي جاك ما اعتقو بالمال الشرط عازم اباك ينرتقو وان كان قالو لا عقبا نوسع فتقو نبه بالامان فوق النحاس بشربو عشان يسمعو الناس البعاد والقربو عقب البدنى طه يمين عقابو نخربو انا المك نمر كبريت يحرق الجربو طه : نمرا يركب الكيك البطل يتحرن نمرا يقلب العوق ام صفوفا جرن خلوات صدرو فى علوم الحروب كم قرن سيفو بينسف الدرع الحديدو مقرن ما نمر الشدر حاضن فروعو مقيل ده النمرالبضاير الصف محل ما يميل كل ما اقول شكر القاهو فيهو قليل كفو بيخجل العين السحابها منيل قبيلة المك قبيلة ما بتختا اصولها العشمان يعيش فوق ضلها ومحصولها بالشين البدورها بعيد عليهو وصولها فروعها سيوفها ومطارق جعل فى اصولها عرمان جدكم والنسبة عباسية و اعياد فضلكم لليلة ما منسية هاهى الدنيا حية بى فخركم مكسية نزيلكم ما بهم ان سوى الاف سيئة من سابق العرب فى اصلها و فخوذة مثبوتة الرجالة وعنكم ماخوذة صغيركم يدخل الحارة ام لبوس يخوضها مجرب من قديم سيفكم بوابر الخودة واحد حاجب قاعد جمب المك نمر وقف و قال: نبه بالامان فرسانّا فازت و هزت دقينا النحاس فوق الرجال اتعزت عروس الكجرة فرحانة و طرب اهتزت عرمان عزّ الله قبيلتو بيك اعتزت المك: وصلوا طـه للبيت المخصص ليهو واحفظوا كل موجودو و جميع ما ليهو خدمتك يا حسن تقعد معا تسـليهو في كل يوم تعين ناس يغفروا عليهو طه: عاشمكم مأكد ما بيرجع خايب صغيركم رايو عند الغير يوازن الشايب شايبكم مدرب رايو دايما" صايب فارسكم جسورا" ما بدقدق هايب تمانية ايام قهر عينية جافي منامن ساكن قلبي ديش الهم حاصرو وكامن دخل عريان و خايف مرقت لابس و آمن ما تنوم عين عدوك الليلة نوم متطامن |
|||||||
|
|
|
04-23-2009, 09:57 AM
|
رقم المشاركة : 25 | ||||||||||||||||||||||||||||||||
|
رد: المـــك النـــمــر
واصل واصل يا حامد يا جميل
|
||||||||||||||||||||||||||||||||
|
|
|
04-23-2009, 10:09 AM
|
رقم المشاركة : 26 | |||||||||
|
رد: المـــك النـــمــر
|
|||||||||
|
|
|
04-23-2009, 01:07 PM
|
رقم المشاركة : 27 | |||||||||
|
رد: المـــك النـــمــر
|
|||||||||
|
|
|
04-23-2009, 01:37 PM
|
رقم المشاركة : 28 | ||||||||||||||||||||||||||||||||
|
رد: المـــك النـــمــر
على العين والراس ام حازم لكن والله العظيم يا تراجى سبقتينى فى حكاية نعوم شقير دى بالجد والله يا تراجى اننى افخر بك واشكر الله انك احدى الاصوات النسائيه التى تكتب بدوافع من ضميرها الى بلادها .... شكرا تراجى وااسف ان ازعجتك كتاباتى هنا
|
||||||||||||||||||||||||||||||||
|
|
|
04-24-2009, 01:37 AM
|
رقم المشاركة : 29 | ||||||||||||||||||||||||||
|
رد: المـــك النـــمــر
أخوى حامد تحياتى ... أمـير |
||||||||||||||||||||||||||
|
|
|
04-24-2009, 02:46 PM
|
رقم المشاركة : 30 | ||||||||||||||||||||||||||
|
رد: المـــك النـــمــر
الاخ/ حامد واصل هذا السرد الجميل وهو بوست توثيقي لقصة حب خالدة، وقد شاهدتها مسرحية على المسرح في بخت الرضا بالديم ايام عز بخت الرضا حينما كان والدي هناك، ولا تزال القصة عالقة بذهني. التحية لك ولضيوفك. متابعة وحضور دائم نكشة: _____ تراجي ازيك يا ام حازم
عصابات توم اند جيري ديل قريتي ليهم الاخلاص والمعوذتين ول شنو  ما احلاك وانت ماسكاهم. خليك كده عليك الله طوااااااااالي   والله لقيتك ما عارف اقول ليك شنو؟؟؟؟؟ |
||||||||||||||||||||||||||
|
|
|
04-25-2009, 01:02 PM
|
رقم المشاركة : 31 | |||||||
|
رد: المـــك النـــمــر
الاعزاء السيالي و تراجي ,, الامير و أمين البشاري سعيد بوجودكم و متابعتكم |
|||||||
|
|
|
04-25-2009, 01:12 PM
|
رقم المشاركة : 32 | |||||||
|
رد: المـــك النـــمــر
المك: مالك يا النصيح متل التقول في محنة؟ قول انعشنا بالصوت الجهور افرحنا ابدي بنصياحك وبيها اخير انصحنا واختم بالحماس بالفينا قول لي نحنا النصيح: خل عجب النفس الدنيا قيدا قصير وبشرك اطرحو لا تكون دوام متغير لا يغرك هوي ضل الضحي المتدير كم سبق الاجل خلا الامل متحير الروح ياتيها علي اي حالة نصيبا والصايداها من حال البرية تصيبا ارضي فيما بيدك قدرها و تنصيبا ان لم ترضي قد زدت المصيبة مصيبا الليلك ان قاطعك ان كنت فاضل واصلو واعفاه ان اساء واجعلّو برّك واصل كلما ازداد سفه زيد في حلمك واصل بذلك تكفي شرو بغير درق و نوافل ما بتعاند القدر وانت ليه متألم صدرك بيّتو فاضي لله امرك سلّم ان عاقك معيق او اصحبك متكلم ارجي جزاك يوم التنصر المتظلم المك: نحن من بيت ملك و ديانة تواريخ السلف هاديانا نحن نفوسنا ما معاديانا ترفع ديمة في وديانا النصيح: نحن الما انجمع لي فارغة كور لمّتنا تعلوا علي مقاليد النفوس همتنا نحن الفي العرب ما بتنخفر زمتنا تيجان الملوك تعمل حساب عمّتنا نحن الدنيا هيلنا زملنا ديمة الشيحة الغفر المخاوف لينا بطنو مسيحة للعشمان تجد دارتنا ديمة فسيحة ترمي الفي زحل و تخت بدالو كسيحة تراها الدنية حية ادونا عنها امانا من عهد الصغر لي وكت هرمانا بي مر الدهور ثم العصور و ازمانا لو كان بالوهم فت يوم سهاما رمانا يدخل جعلي مندفعا الي المجلس يقول: الشكرية زاحفة الليلة جات بي عقابا ختت في النصاب لي كتالنا مادا رقابا لقيت يا مك جمال سارحة خربو الغابة واندق الزرع لا قصبة لا رقّابة المك: مطير درقة وين فارقت عقلك شرّق؟ الجعلي: انا ود الحروب البي سيوفا مجرّق اديني الاذن يا مك و سيفي مطرّق اعصر كيكي فوق كوش العريب يتفرق المك: الخيران كتار ما اظنهم متسابي وبي كتال قوم جعل ما بفرحوا الكسابة ما بجو ناس كتال الناس معانا نسابا والبيناتنا لابد يحسبولا حسابا في هذه الاثناء يدخل وفد من الشكرية الشكري: سلام يا مك دار جعل يا مك نحن اُّزينا بي موت ود دكين كل القبيلة حزينة محمد بقولك بي نسبك اتعزينا رسل لينا طه قبال تجي تعزّينا المك: حمد قبيل طه يوم دارو جاهو براهو ما دق الطبول و قبيلتو جا تبراهو السواها طه اكبر علي محراهو راجل خاف جري تجري القبيلة وراهو؟ ضعيف كاتل حمد في القوة ما وافاهو بس خانو القدر ساكت اجل وافاهو الراي السديد شيخ العرب يعفاهو والزي ود دكين دم طه ما وافاهو مالك يا شيخ العرب لي راسك حاني؟؟ الشكري: الفي صدري شيتا" حايصة ما رايحاني راضي الحال علي كاتل نسيبك حانّي الظانينو كان تقتل اسم بطحاني المك: الظالم لي من ما حملت عزاهو وحقك تاخدو تام وكتين تقيف في جزاهو البعفي المسيء عند الله بلقي جزاهو الشكري: محال نرجع محال من غير طه ولا نكتلوا نرجع لي قبيلتو كتالنا ما بتثبتلوا المك : قول ليهو طه نزيلنا و المك جارو واصبح في امان الما بهمّل جارو شن جاكم جديد كنتو الفضل تُجّارو ما تعفوه طه في دربو ليه تتجارو؟ الشكري: في زولنا الكِتل هانت مسافتو و قربت والكاتل كان بخلوهو طه ما كان كربت غير نطلب اذن زاملتنا كانت شربت كان دي الحالة بدري الدنيا كانت خربت يدخل طه واقفا" بين المك و وفد الشكرية قائلا": يا مك فداك وديني ما تتكتلوا سلمني النسد فوق ديني بي سببي الخراب لي وطني ما برضيني حقن دم العرب بي دمي غرّة عيني المك ما تحسب حساب وكتين بقيت في أماني وتسليمك محال في الدنيا حي عرماني الجن و الانس كان تجي مداهماني دونك دمي يتدفق و دم قيماني يا ناس بيناتنا النسب كان جيتو بالودية في دم الكتيل راضين نخت الدية وان كان قلتوا لا ودرتو الكلام ايدية ادق التور ضحي و نجرب الزندية الشكري: دا الشين البخلي الزول يعضي ايديهو المك كان ختي منو البقوم يهديهو كاتل ود دكين لا تكتلو لا تديهو الشر اقصرو والزول اخير عديهو المك: بعد الهد دحين بيناتنا حد السيف وكان ختيتو دية انا منكم ما بقيف راعيكم جديد ما برعي في العليف عتبات الصرات اهونلو من القيف جيتو تهددونا الرسلوكم شربو بكرة الجيش بجيكم اثبتو واحملو حربو شاردكم ما بخلي والحق عقابكم اخربو والنازل البحر عدوها بس معقورة الشكري: الشكرية زاتا قبيلة ما محقورة ان درتوها ياما تلاقو فيها صقورا قبال يثبت الفارس يختفو القورة المك: بقيتوا رجال و تغيروا تصلوا لاعن وكري؟ يا قراضة القبايل النص جمعكم مكري قولو للرسلكم ما يجيني عقبان شكري البيناتنا خربت ارجو عاد عود فكري الشكري: قبيل حامدين فعايلك و بانشراح جايينك ليه بتهينا يا مك كتيرة دي منك وكت ابعدتنا و بقي طه ليك و منك ان زليتنا و ان جليتنا ما ناطينك ما فينا الاضينة و مانا قلة كتار نخوض الحارة نحن بنوجب البتار صغيرنا ان جال يعجبك للصفوف بحتار كبيرنا يفرتك الحافلة و يجيب التار جرّق ما جفل خايف صياح الساقية والحارس السرج لابد تكورك راغية سمعناها عاد و الفارقة ماها ملاقية عرفناها المعاك نرجع و تبقي الباقية المك: هوي يا عرب احسن تراعو ادابكم واسوه الكلام قبال اواسي رقابكم ماعندي الاضينة الاصلو معدود دابكم فد جعلي ان ركب حالا" بخربو عقابكم فلاحة العربي داب سفروقو يجلب كلبو يا يربط الدرب يرجي الاضينة يسلبو الهيلكم حقيقة و فيها ما بتنغلبو فالحين في القنيص ترعو و تعرفو تحلبو رجالة و كرم ديل بيهن اتخصّينا وكت الكوع يحر نحجا العروض و نصينا هد شامخ الجبال كان دُرنا ما بعاصينا سيوفكم في الحرب بنكسّرن بي عصينا كفاكم استريحو من الكلام دا قضينا والدرتوها انتو نحن بيها رضينا قبل تمتسو دابكم تلقو نحن حضينا والحكم الحسام والسيف يكون قاضينا آخر تعديل حامد يوسف يوم 04-25-2009 في 01:19 PM.
|
|||||||
|
|
|
04-25-2009, 02:41 PM
|
رقم المشاركة : 33 | ||||||||||||||||||||||||||||||||
|
رد: المـــك النـــمــر
تشُكراخ حامد يوسف التحيه لك على هذا السرد الجميل بي الفوق دى ذكرتنى زمان لما كنا في الابتدائى كنا بي نمثل فيها في شكل ادوار اي زول يقولوا ابقي ريه يقول لا 
|
||||||||||||||||||||||||||||||||
|
|
|
04-26-2009, 04:26 AM
|
رقم المشاركة : 34 | ||||||||||||||||||||||||||||||
|
رد: المـــك النـــمــر
الحبيب ود قرشي يديك العافية ههههههههه والله ريا فارسة يا اخوي اريت نسوان الزمن دا زيها بدل مظاهراتهن لي لبس التي شيرت |
||||||||||||||||||||||||||||||
|
|
|
04-26-2009, 08:59 AM
|
رقم المشاركة : 35 | |||||||
|
رد: المـــك النـــمــر
أنصرف الوفد الشكري غاضبا" بعد الاهانات المتبادلة و استعد الطرفين للمعركة في مكان آخر ببيتها كانت الملكة شمّة تبكي و تنوح علي فقدها الجلل فقد كان عمها من فرسان العرب و ذو مكانة عالية شمّة: غرار العبوس الليلة دار دولابا يا خريف البطانة و مرتع الجلابة بتعقر الركوبة و تنحر الحلابة كم قشيت دموع وجعة و نتعت غلابة عمي العم سيل ايديهو روي المايل تساب بحر المحيط الما بضمو الساحل يا حليل ود دكين مونة المقيم و الراحل سند الهاقعة نشال التقيل الواحل صعيب فقدك علي و شوية فيك بكايا انوح لامن اروح عيني انقطع وكّايا قابلني الدهر قاصدلو فيّ نكاية بعد النكبة دي باديلو تاني حكاية وا وجعي الشديد انا جمري زاد في وقيدو ابوي بي قبيلتو جا ودار يستتير في فقيدو الجيش كلو اهلي راسو اخوي و عقيدو طه المك حماه و الشر صعب ترقيدو تاقت للمروق انا روحي جات متطاردة صعب الحال خلاص و العقدة ما متجاردة الشكرية امس لحقوها حارة و باردة خلو المك زعل حالف يعقر الواردة ديل ناس وجعة كان عملوا زي ما يعملو مالو المك كان فوت كلامهم حملو قالوا عطاشي وارد بينزلوا يملوا وكان انسل سيف تاني القبيلتين كملو بعضي مجافي بعضي و ليه اضحي ميلادي الليلة انا اتصادم مطارفي بي تيلادي كان المك يفوز افقد ابوي و بلادي و التانية ان بقت افقد ابو اولادي ضاق صدري الوجيع يا همومي وين تنجمعي ودع روحي طشش شوفي فارق سمعي طال اليوم بكاك يا عيوني جود اهمعي اصبح جفني جاف و الوحة حرقت دمعي كيف اعيش و انا صبري ودّع ناجع اححي فترت و ما لقيت لي مواجع غير ود النعيسان منو للمك بيراجع يسمع قولو لو يلقاه راقد هاجع دابي عترت في الزول البحل الصعبة قدريش عندو فرتيق العقد يوم يعبة من شدة دهاه القاسية تصبح لعبة وان داير يقسي الهينة تصبح صعبة طايعة و راضية دهبي و مالي كلو ليهو اديهو لي ود النعيسان دون نزاع اهديهو صافيات حسي في الحال تمشي لي تناديهو (صافيات اسم احدي الجواري) يروح للمك سريع من زعلو دا يهديهو حليل ايام هناي و رضاي و مروحي عاكسني الدهر اتشفي دمي جروحي يا صافيات لي ود النعيسان روحي ما تجي دونو .. ححي فاضلّي اخنق روحي تذهب صافيات و تخبره فيأتي للملكة ود النعيسان: سلام يا ملكة الدار يا ام عمارة سلام عليك ما لَي جسارة و صدري فيهو كلام وكت انتي سوت بيك كدي الآلام نايحة الدروب مظلومة كان تتلام لي فخر الجدود يا ملكة ليه متناسية تروس الحافلة ابواتك بدور الماسية تلوب الحارة و جبال الثبات الراسية انتي تصبّري ما بصبّروك في القاسية من ابواتك العز ديمة ليك اسورة معروف ثباتك تجبري المكسورة حليلك سما العز و اولادا نسورا دارك عامرة و الفرسان عمادا و سورا شمّة: صدقت علي المتلي الثبات مفروض كمل توب الصبر و اليوم لبسنا عروض علي الهم كتير و انا صدري مملا غروض ود النساني ما قدمت ليك عروض التحت الطبق شيلو مسحة شارب ما قدر المقام يختا و شوية يقارب ود النعيسان: ديل خروز دهب يا ملكة ولا عقارب الجهرن عيوني الدنيا باقي مغارب جود كفك طمح يا ملكة سيل غرّقنا راشي خضر عودنا بعد المحل ورّقنا يا صاحبي الفقر انا وانت ما اتفارقنا اختر ما تعود غرّب عديل شرّقنا شمة ات فرحتي و الهم دخيل قاصيني للعبرات ابلّع و الدمع عاصيني ود النعيسان: يا ملكة العليك مخصم يمين خاصيني ختي حملتو فوقي و تاني ما توصيني الساس الرموه عقب ما بتقدم قبل ما يختّو طوف يلقوا القديم اتهدم كل واحد اخليه علي السبق يتندّم قط ما تخافي شي همك رقد و اتدمدم ما نيتي شي غير اعني ابوك في محلو و بشيش ادخلو بي كلاما" حِلــّو ازيل الفي الصدور و كلامي ينشر حلو بعدين الكلام بعرف طريقة احلــو بعد ما يرضي ابوك المك بعالج صدرو وبقطع في الكلام وعي افتّر قدرو شمّة: نضرا" فوق دكين العالي راسه و قدرو التحت الطبق ليك خمسة كيمان قدرو ود النعيسان: الوصلت كفاي يا ملكة ماها قليلة خليني النمشي هسع وقفتي مليلة نيتي ابوك عديل في ظني اقضي الليلة الجمرة ان طفت في يدي تاني اشيلة بدور بنتا" توصل لي تكون مامونة شمة: تعالي يا ليمون ود النعيسان: شن سموها ليمونة ولا امونة تفتحو في الشرور ان قلنا شي تلومونا شمة: شن داير بي اسمها ما تشيل توصل ليك ود النعيسان: توصل لي بنية الملكة هيل دليك؟ شمة: شن راس مالا ما شيتن كتيرة عليك شيلا مع الهدية خلاص دفعتها ليك ود النعيسان: مقبولة الهدية الكل شي جامعاهو فيها غناي و فيها البغني و البسعاهو طبقي ملان دهب و بنيتي ماشة معاهو يجزيك الكريم بالخير حماك يرعاهو يا ليمونة شيلي النمشي لي قدامنا خيرك عم دايرين نحن نقضي كلامنا ودعناك الله نومي عاد متطامنة تصبحي تلقي كل شي تم ودارك آمنة يخرج ود النعيسان شمة: في وداعة الله قدامو و وراهو عديلة ما يصادف شرور من ديك او من ديلا سائلة المولي الاحزان سريع تبديلا بالهنا و السرور الداير يتم تقديلا يتوجه ود النعيسان الي ارض الشكرية و كما هو معروف فالرجل من دهاة الجعليين و هو ابن عم المك نمر آخر تعديل حامد يوسف يوم 04-26-2009 في 10:49 AM.
|
|||||||
|
|
|
04-26-2009, 09:06 AM
|
رقم المشاركة : 36 | |||||||
|
رد: المـــك النـــمــر
الله يخدر ايدك يابو ضراع |
|||||||
|
|
|
04-26-2009, 09:19 AM
|
رقم المشاركة : 37 | ||||||||||||||||||||||||||||
|
رد: المـــك النـــمــر
أها شفت الدهب ده موجود من جدنا ود النعيسان ....وسبحة بنونة بت المك برضو موجوده رايكم شنو
|
||||||||||||||||||||||||||||
|
|
|
04-26-2009, 10:50 AM
|
رقم المشاركة : 38 | ||||||||||||||||||||||||||||||
|
رد: المـــك النـــمــر
تسلم والله يا الطاهر الله يمتعك بالصحة و العافية |
||||||||||||||||||||||||||||||
|
|
|
04-26-2009, 10:52 AM
|
رقم المشاركة : 39 | ||||||||||||||||||||||||||||||
|
رد: المـــك النـــمــر
يا سلام يا سيالي ياخي والله دا شي يفرح القلب تسلم يا حبوب و يسلم ود النعيسان و تسلم البنونة فقد كتبت اروع الشعر في اخوها المك عمارة |
||||||||||||||||||||||||||||||
|
|
|
04-26-2009, 10:54 AM
|
رقم المشاركة : 40 | ||||||||||||||||||||||||||||||||
|
رد: المـــك النـــمــر
تسلم انت يا ود حامد وتسلم من اربعة وتحشر مع اربعة يااارب
|
||||||||||||||||||||||||||||||||
|
|
|
04-26-2009, 11:02 AM
|
رقم المشاركة : 41 | |||||||
|
رد: المـــك النـــمــر
|
|||||||
|
|
|
04-26-2009, 11:10 AM
|
رقم المشاركة : 42 | |||||||||
|
رد: المـــك النـــمــر
|
|||||||||
|
|
|
04-26-2009, 11:52 AM
|
رقم المشاركة : 43 | |||||||||
|
رد: المـــك النـــمــر
ودى هدية منى اليكم برضو
|
|||||||||
|
|
|
| أدوات الموضوع | |
| طرق مشاهدة الموضوع | تقييم هذا الموضوع |
|
|
العرض العادي
