هدية لأبطال الأمة السودانية..وليد مادبو وبشرى الصادق... أمل الشعب

بالله عليكم الله صحافتنا دي ما بتخجل، ولا احنا زاتو، مالين جرايد الليله وبكره في قصص بطولات السيد بشرى الصادق و السيد وليد مادبو

ما احنا خلاص مشالكنا تب اتحلت

بس لو امكن طلب بسيط للابطال ديل، عندناشوية مشاكل لو امكن يساعدونا في حلها



معليش يا شباب، الصورة فيها الوان بس جات كده، بعدين اعذرونا على الخط

والله يا ود ابنعوف غايتو فالك زى خطك
فعلا احزان واحزان ..................

أخي أحمد


لوحه معبره جدا

تحكي حال البلد الذي لا يسر.

اقتباس: المشاركة الأصلية كتبت بواسطة محمد السيالى     والله يا ود ابنعوف غايتو فالك زى خطك فعلا احزان واحزان ..................

ازيك يا ود السيالي

تشكر على التعليق، بالذات الخط

بالله عليك، دي ما بلد سجم، وعلى العلينا والهموم الشايلنها في راسنا يجيك زول يقول الشوايقة والجنجويد وآل البيت غشونا.

غايتو، كوكو اكتر زول عاقل لمن قال طلع من البلد نهائي.

وعمنا تنقو، بارك الله فيه، عمل احسن حاجه، اهو يلقط حبة تبرعات لمستشفى السرطان ويشتري ليهو كم مرتبة كده للعيانيين، لكن لمن ينوم بليل ضميرو بكون مرتاح.


الخريطة دي كانت ممكن تتضمن احباطات اكتر من كده، لكن ما عرفت احشرها وين، المصايب ما كتيرة يا ود عمي

اقتباس: المشاركة الأصلية كتبت بواسطة Fatoush     أخي أحمد لوحه معبره جدا تحكي حال البلد الذي لا يسر.

تشكر على المرور اخي فتوش

الدور والباقى على منو؟

لكم الله ايها الشعب الصابر

حبيبنا احمد

جسدت واقع سودان الانقاذ, اتمنى اكون بقلم رصاص عشان نمسح و نرسم السودان الجديد على نفس الصفحه

اخونا / احمد ابن عوف

امبارح شارب شنو انت يا زول؟؟؟
والله ده كلام مساطيل مالك داير تفتح الجراحات
وبعدين خريط مايلة تقول صادمه قندران

حبينا نسجل حضور بس ونشيل معاك الفاتحة

اقتباس: المشاركة الأصلية كتبت بواسطة محمد ابراهيم هباني     حبيبنا احمد جسدت واقع سودان الانقاذ, اتمنى اكون بقلم رصاص عشان نمسح و نرسم السودان الجديد على نفس الصفحه

اخونا محمد هباني

تشكر على المرور

وفعلا، زي ما قلت، لاوم نشطب الكلام دا كلو ونرسم سودان جديد، لكن لازم نضع في اعتبارنا كل الخريطه، اذا فكرنا في انسان دارفور فقط، لن ننجح، واذا ركزت على تنمية الجنوب ونسينا الشرق ايضا لن ننجح.

يجب علينا ان نحمل هموم الكل.

اقتباس: المشاركة الأصلية كتبت بواسطة أحمد ابن عوف     بالله عليكم الله صحافتنا دي ما بتخجل، ولا احنا زاتو، مالين جرايد الليله وبكره في قصص بطولات السيد بشرى الصادق و السيد وليد مادبو ما احنا خلاص مشالكنا تب اتحلت بس لو امكن طلب بسيط للابطال ديل، عندناشوية مشاكل لو امكن يساعدونا في حلها معليش يا شباب، الصورة فيها الوان بس جات كده، بعدين اعذرونا على الخط

اخونا بن عوف تحياتي
نعم هناك كثير من الالام والقضايا التي يندى لها الجبين.
اخي انت رقص البشير اليومي على الجثث ده كله ما جدير بانه ينزل قبل الكلام المنزلوه على اليسار او ما شمله الخريطة باليسار ده.
وبعدين هناك 2.500.000 نازح وليس 100.000 فضلا عن 300.000 شهيد قتلوا على يد الجنرال لالراقص.
حاجة تانية انت حلايب ده من المسكوت عنها شنو انت جاي توقظها اليوم.
مش قالوا ( لا تسألوا عن اشياء ان تبدو لكم تسوءكم ) ؟؟
حبيبنا عايز ارفع نفسك شوية
بس والله امر يشيب له الرؤوس.
لكن اقول انه الصحافة لها الحق اذا كتبت عن شيء جاد جاء مقص الرقيب قصاه وقص ما ليس له علاقة حتى بما تكتب يعني بالبشيري كدة ممكن الصحيفة ما تستطيع الصدور بكرة .
عشان كدة خلي الجرايد تكتب عن اشياء هايفة كدة عشان ما تثير كلاب النظام.

أخونا ود أبنعوف ,,

تحياتي ,,

كبري توتي وينو في الزحمة دي ؟؟؟؟؟

خريطتك دي ياخوي كلها قتل وضبح وسفك دماء
يعني الشعب المسكين دا ما بعرف جبجبة ولا هجيج ولا يوم حلو ظاااطو ؟؟؟


عالم بطاالـــة

اقتباس: المشاركة الأصلية كتبت بواسطة amin_bushari     اخونا / احمد ابن عوف امبارح شارب شنو انت يا زول؟؟؟ والله ده كلام مساطيل مالك داير تفتح الجراحات وبعدين خريط مايلة تقول صادمه قندران حبينا نسجل حضور بس ونشيل معاك الفاتحة

ازيك يا امين

رسمتها امبارح، وانا قاعد في تربيزة السفرة بذاكر لتيمان في سنة تانية ابتدائي، وشابكني ليك، لا استعمل لوني انا الاخضر، و واخته (تيمان ولد وبنت) لا استعمل اللبني، المهم طلعت زي ما انت شايف.

الجراحات دي يا امين، لو ما شايلها كلها في راسك، نظرتك للامور بتضيق، اي حزب من الاحزاب السياسية اليوم، يستطيع ان يخرجنا من الورطة الانتا شايفها دي.

الحال الاحنا فيهو دا داير شغل كتير، وبالضرورة اي محاولة لمزيد من التفرقة في البلد لن تكون في صالحنا.

يجبك واحد مسئول كبير في الدولة ويطلع في التلفزيون يقول ليك، ممكن نرجع للحرب تاني، ايا ابن الـ..... بلاش، والبلد اساسا منو القال ليك مافيها حرب.

ما ليك حق تقوم تلفها بكرتين.

اقتباس: المشاركة الأصلية كتبت بواسطة محمد عبد المجيد     أخونا ود أبنعوف ,, تحياتي ,, كبري توتي وينو في الزحمة دي ؟؟؟؟؟ خريطتك دي ياخوي كلها قتل وضبح وسفك دماء يعني الشعب المسكين دا ما بعرف جبجبة ولا هجيج ولا يوم حلو ظاااطو ؟؟؟ عالم بطاالـــة

الجبجبه بعرفه زول واااااااااحد بس !!! عرفتو منو !!! الحمد لله ما عندنا عشره بلدي !!!

اقتباس: المشاركة الأصلية كتبت بواسطة حسن ابراهيم فضل     اخونا بن عوف تحياتي نعم هناك كثير من الالام والقضايا التي يندى لها الجبين. اخي انت رقص البشير اليومي على الجثث ده كله ما جدير بانه ينزل قبل الكلام المنزلوه على اليسار او ما شمله الخريطة باليسار ده. وبعدين هناك 2.500.000 نازح وليس 100.000 فضلا عن 300.000 شهيد قتلوا على يد الجنرال لالراقص. حاجة تانية انت حلايب ده من المسكوت عنها شنو انت جاي توقظها اليوم. مش قالوا ( لا تسألوا عن اشياء ان تبدو لكم تسوءكم ) ؟؟ حبيبنا عايز ارفع نفسك شوية بس والله امر يشيب له الرؤوس. لكن اقول انه الصحافة لها الحق اذا كتبت عن شيء جاد جاء مقص الرقيب قصاه وقص ما ليس له علاقة حتى بما تكتب يعني بالبشيري كدة ممكن الصحيفة ما تستطيع الصدور بكرة . عشان كدة خلي الجرايد تكتب عن اشياء هايفة كدة عشان ما تثير كلاب النظام.

سلام يا حسن

لو دققت شوية حتلقى في كل مربع ستة اصفار، يعني اتنين مليون، وعلى ما اعتقد في نص مليون في معسكرات بتشاد.

بالمناسبة ارقام القتلى والحوادث تلك فقط في الاربعة شهور الفاتت، وانا نسيت اخت الملاحظة دي.

تخيل البلد قامت فيها كم حرابه في الاربعة شهور دي.

تشكر على المرور اخي حسن، لكن الواقع مؤلم شديد، والناس لازم تصحى شوية، عشان ما نشيل الفاتحة زي ما قال اخونا أمين بشاري.

خريطة الصحة وين يا ابن عوف ؟!!!!".
مشاكلنا دي بسيطة زي دا بالله ونحنا ماعارفين
دي مشاكل كم سنة ؟
الانجليز وكت طلعوا البلد كان كيف
شكلو نحنا جارين للورا جري صاروخ


فلتسقط كل الخرط والاطالس




الفااااااااااااااااااااااتحة

اخونا ود عبد المجيد

تحياتي

اقتباس: المشاركة الأصلية كتبت بواسطة محمد عبد المجيد     أخونا ود أبنعوف ,, تحياتي ,, كبري توتي وينو في الزحمة دي ؟؟؟؟؟

امكن يكون ضربوا الطيران المصري، وللا عدد واحد توماهوك، الـ لليله ما عارفينو فكوهو من وين

اقتباس: المشاركة الأصلية كتبت بواسطة محمد عبد المجيد     خريطتك دي ياخوي كلها قتل وضبح وسفك دماء يعني الشعب المسكين دا ما بعرف جبجبة ولا هجيج ولا يوم حلو ظاااطو ؟؟؟

جهز كلاشك يا عمك، اولاد السادة زاتم بقوا يضربوا بالشلاليت وشايلين معاهم مسدسات، طيب ديل خلو لقطاع الطرق شنو، مع احترامنا لقطاع الطرق

حقيقي، اكون زول متهور ساكت لو بقيت حايم في السودان وما شايل معاي سلاح

ولا بأس من اقتناء حاجة كده مضادة للطيارات، ماك براك شايف اجوانا مستباحة كيف

اقتباس: المشاركة الأصلية كتبت بواسطة محمد عبد المجيد     عالم بطاالـــة

اسكت ساكت بس

اقتباس: المشاركة الأصلية كتبت بواسطة hariga25     خريطة الصحة وين يا ابن عوف ؟!!!!". مشاكلنا دي بسيطة زي دا بالله ونحنا ماعارفين دي مشاكل كم سنة ؟ الانجليز وكت طلعوا البلد كان كيف شكلو نحنا جارين للورا جري صاروخ فلتسقط كل الخرط والاطالس الفااااااااااااااااااااااتحة

اها دا تاني زول يشيل الفاتحة

ازيك يا حريقة

مشاكلنا بسيطة موش، في داعي نستدعى ليها وليد مادبو وبشرى الصادق عشان يحلوها لينا، وللا نرجاهم في المشاكل الكبيرة

اقتباس: المشاركة الأصلية كتبت بواسطة محمد ابراهيم هباني     الجبجبه بعرفه زول واااااااااحد بس !!! عرفتو منو !!! الحمد لله ما عندنا عشره بلدي !!!

أها شوف الجبجة دي وقعدة طرب
مش حقو الصورة دي تتعلق فوق بدل الصورة ديك

عالم مووو بطااالــــة لكن !!!! ,,,,

الاخوة الافاضل
لكم التحية
الحقيقة نحن محتاجين كتير عشان نمسح الخريطة دي , لانو نحن الرسمنا الخريطة دي , بتخلفنا , وهروبنا من المواجه , وفقرنا وجهلنا , خلينا الناس تتحكم في مصايرنا .
اكيد الشعب اقوى من كل جبروت

أخي ود أبن عوف
خد دة معاك في الخريطة


أمل ياتو شعب ؟؟؟؟

والله حكاية صعبة خلاص وبالزات حكاية القبائل البتحارب بعضها دي ناس فقرانا ومالاقيا حق العلاج يجي يزيدوهو تاني, شايفك مركز على على حكايات القصف الاسرائيلي انت داير تصل لشنو, ووين القصف التشادي والفشقة المحتلاها اثيوبيا

ودأبن عوف .......غليتني بي بوستك ده من الصباح

و كمان معاهو خطك ....البشبه خط (المصريين)

ذكرتني بي (أستحكمت حلقاتها ... و أظنها لا تفرج)

بالله عليكم .......كيف يستطيع هولاء من النوم ؟؟؟

ما لون (قلبهم ) ... و (ضميرهم) ..

ما أصبرك يا شعبي ... يا أهلي و ناسي

بالمناسبة نسيت حاجة مهمة ... مع أنها تندرج مع الصحة

و هي نسيت ترسم لينا وساخة الشوارع و عفونة الكوش

و الذباب و الناموس و صحة البيئة .... نسيت ترسم لينا

التدني الاخلاقي من دعارة و فشخرة بالموبيلات و تفسخ

و تنصل و تقليد و استعراض (لا يشبه واقعنا)

نسيت ترسم لينا الاغنياء و هم يدوسون على رقاب

الشعب الفقير

نسيت ترسم لينا (الحكومة الكاذبة) المتوهمة بأنها تحمل

هموم شعبها ... و تلفزيون السودان يصور لنا السودان

بأنه يضاهي باريس

نسيت أن تصور لنا (الابواق ) الناعقة ..... و همو كثرو

نسيت أن تصور المرتزقة و المتسلقة و المتردية و النطيحة

ألف تحية أيها الغارق في بحر الهموم

اقتباس: المشاركة الأصلية كتبت بواسطة هاجر ياسين     الاخوة الافاضل لكم التحية الحقيقة نحن محتاجين كتير عشان نمسح الخريطة دي , لانو نحن الرسمنا الخريطة دي , بتخلفنا , وهروبنا من المواجه , وفقرنا وجهلنا , خلينا الناس تتحكم في مصايرنا . اكيد الشعب اقوى من كل جبروت

الاخت هاجر

سعدنا بمرورك، وزي ما قلتي الناس بعد كده مفروض تعرف الطريق الصحيح، القتل ومزيد من الاقتتال يعني نحن فقط الخاسرون.

اقتباس: المشاركة الأصلية كتبت بواسطة قاتكوث ديو دينق     أخي ود أبن عوف خد دة معاك في الخريطة أمل ياتو شعب ؟؟؟؟

اخي قاتكوث

للاسف لم استطع ان ارى الفيديو، ولكن لاحقا.

لكن من اسمه واضح يا معلم، البلاوي كتيرة

ابن (عفوف )
والله حايم من الصبا ماقادر اكتب حاجة بالجد حاجة توجع القلب ... والادهي القادة متكدسين بالخارج وبالخرطوم في الاحياء التي صممت علي طراز (بلاد برة)....
احمد والخريطة لسع فيها الكتير لكن دا بس يجعل القلب يدمي وغير الجراحات التانية يا احمد غير الناس السألوا عن وساخة الشوارع اقوليهم هي وين من وساخة النفوس والضمائر .....


اذا لم نتحد كلنا(انا انت هم الشعب) لنغير هذه الخريطة فقل حينها الفااااااااااااااااااتحة


لك التحية والله مافي بوست المني زي دا يا احمد

اقتباس: المشاركة الأصلية كتبت بواسطة أحمد ابن عوف     وعمنا تنقو، بارك الله فيه، عمل احسن حاجه، اهو يلقط حبة تبرعات لمستشفى السرطان ويشتري ليهو كم مرتبة كده للعيانيين، لكن لمن ينوم بليل ضميرو بكون مرتاح.

والله يا احمد السودان لسع بي خير والحاجة المطمناني انو الناس الماوسخت السياسة ضمائرم ولا الثراء المبوه هم القابضين علي جمرة السودان ...

مشروع مستشفي السرطان فيهو اكتر من كم قروب والحمد لله اليوم ان شاء الله حنشتري مجموعة مراتب وملايات كجزء اول وعلي السريع ....

يوم الخميس في مجموعة شباب كونوا مروع كساء دارفور

مع بداية المدارس في مشروع الكراس المدرسي .... الماي كويس جدا

والغريبة كل القروبات دي ماعندها انتماء سياسي او حتي مرات انها تكون مسجلة كمنظمات .....

يعني الفاتحة بدري عليها

اقتباس: المشاركة الأصلية كتبت بواسطة The koshian     والله حكاية صعبة خلاص وبالزات حكاية القبائل البتحارب بعضها دي ناس فقرانا ومالاقيا حق العلاج يجي يزيدوهو تاني, شايفك مركز على على حكايات القصف الاسرائيلي انت داير تصل لشنو, ووين القصف التشادي والفشقة المحتلاها اثيوبيا

اخونا الكوشي

سعدنا بعودتك، ان شاء الله الامور كلها تمام.

القصف التشادي قاعد، انت بس زح الصفحه يمين شوية، والفشقة برضو قاعده، بس كتبت عليها احتلال اثيوبي، لانو لو كتبت الفشقة بخطي الشين دا كان ممكن يحول مجرى البوست.

اقتباس: المشاركة الأصلية كتبت بواسطة أحمد ابن عوف     امكن يكون ضربوا الطيران المصري، وللا عدد واحد توماهوك، الـ لليله ما عارفينو فكوهو من وين

أبو حميد ..
سلامات يا راجل ..
كلامك الفوق ده ذكرني أيام محاولة الإغتيال الحصلت لحسني مبارك في أديس ..
أها صاحبك أول ما رجع مصر عمل مؤتمر صحفي ..
في واحد من الصحفيين قام سأل حسني مبارك قال ليه هل يستطيع الجيش المصري التصدي لسلاح الطيران السوداني ؟؟
حسني مبارك بعد ضحكة خبيثة كده قام رد عليه بي لهجتم قال ليه ( ده كل اللي عندهم طيارتين .. واحدة راكبها عمر البشير والتانية معلأنها قمب الهيلتون)

اقتباس: المشاركة الأصلية كتبت بواسطة koko123     ودأبن عوف .......غليتني بي بوستك ده من الصباح

اخونا كوكو

نتمنى ان يصبح الصبح في السودان وكلنا آمنيين فيه

اضافه لكل البلاوي التي ذكرتها، اضف اليها الآتي

السودان مرتع لمافيا غسيل الاموال

السودان في اعلى قائمة الفساد لمنظمة الشفافية

قضاؤنا غير صالح وبشهادة دولية

عنصرية لا حد لها

املنا الآن لا لا نحمل جوازات كالتي يحملها الفلسطينيين

اقتباس: المشاركة الأصلية كتبت بواسطة عمك تنقو     ابن (عفوف ) والله حايم من الصبا ماقادر اكتب حاجة بالجد حاجة توجع القلب ... والادهي القادة متكدسين بالخارج وبالخرطوم في الاحياء التي صممت علي طراز (بلاد برة).... احمد والخريطة لسع فيها الكتير لكن دا بس يجعل القلب يدمي وغير الجراحات التانية يا احمد غير الناس السألوا عن وساخة الشوارع اقوليهم هي وين من وساخة النفوس والضمائر ..... اذا لم نتحد كلنا(انا انت هم الشعب) لنغير هذه الخريطة فقل حينها الفااااااااااااااااااتحة لك التحية والله مافي بوست المني زي دا يا احمد

عمنا تنقو

تحياتي

انت وانا واخوانا في البوست كلهم غلبهم الكلام، عارف ليه؟

كما قال القائل

لم يتركوا لنا ما نقول

اديك امثله

البشير : الزارعنا غير الله اليقلعنا

سلفاكير : لا نريد العودة الى الحرب

صلاح قوش : سنقطع اوصالكم

خليل : قواتنا جاهزة للذراع الطويلة رقم "2"

الترابي : تشان تآمنوا

مني : يأمر قواته بالخرطوم للتوجه الى دارفور ومقاتله قوات خليل

الصادق : كلام هيروغليفي

الميرغني : مبدأه واضح، اذا كان الكلام من فضه فالسكوت من ذهب

نقد : المؤتمر الخامس قرر ان نلتزم بالماركسية كمنهج.


بالله عليك، الحال كما هو واضح ليك في الخريطه، كيف لمن يمسكوا بتلابيب البلد ان يخطرفوا مثل هذه الخطرفه؟

اقتباس: المشاركة الأصلية كتبت بواسطة عمك تنقو     والله يا احمد السودان لسع بي خير والحاجة المطمناني انو الناس الماوسخت السياسة ضمائرم ولا الثراء المبوه هم القابضين علي جمرة السودان ... مشروع مستشفي السرطان فيهو اكتر من كم قروب والحمد لله اليوم ان شاء الله حنشتري مجموعة مراتب وملايات كجزء اول وعلي السريع .... يوم الخميس في مجموعة شباب كونوا مروع كساء دارفور مع بداية المدارس في مشروع الكراس المدرسي .... الماي كويس جدا والغريبة كل القروبات دي ماعندها انتماء سياسي او حتي مرات انها تكون مسجلة كمنظمات ..... يعني الفاتحة بدري عليها

تشكر على الاخبار السعيدة يا تنقو

خوفنا كلو على هؤلاء الشباب، لان امثالهم يعتبرون خطر حقيقي على الكبار الما نافعين.

واتحدى اي زول يجي يجيب لي اسم وليد مادبو وللا بشرى الصادق في اي من المشاريع التي يقوم بها ابنائنا الابطال الحقيقيين.

واحد راكب حصان مع صاحبو السويسري، اضارب مع مع واحد تاني زعلان منو كدا بس.

تسلم يا ود ابنعوف

والله ما قلت إلا الحقيقة ... والرسم واضح ومفهوم شديد

اما الشباب ديل (بشرى+ الوليد) زى ما قلت بمارسوا هواياتهم على حسابنا

اقتباس: المشاركة الأصلية كتبت بواسطة أحمد ابن عوف     بالله عليك، الحال كما هو واضح ليك في الخريطه، كيف لمن يمسكوا بتلابيب البلد ان يخطرفوا مثل هذه الخطرفه؟

ليهم الحق ان يخطرفوا فليس لديهم ولا يعانون من مشاكل
فاصحاب الهكتارات المربعة من الاراضي وملوك الاستقطاع الحديث
واصحاب الخزائن والارصدة الخارجية ....
يحسو كيف ؟؟؟

اقتباس: المشاركة الأصلية كتبت بواسطة أحمد ابن عوف     تشكر على الاخبار السعيدة يا تنقو خوفنا كلو على هؤلاء الشباب، لان امثالهم يعتبرون خطر حقيقي على الكبار الما نافعين. واتحدى اي زول يجي يجيب لي اسم وليد مادبو وللا بشرى الصادق في اي من المشاريع التي يقوم بها ابنائنا الابطال الحقيقيين. واحد راكب حصان مع صاحبو السويسري، اضارب مع مع واحد تاني زعلان منو كدا بس.

فعلاً ... دا المخوفنا والله عليهم لانهم شباب بحبو السودان ما اكتر ما عندهم اي انتماء غير حب السودان ...

ربنا يغتيهم من شر الشرور والاشرار يا احمد

اقتباس: المشاركة الأصلية كتبت بواسطة محمد جبريل     أها صاحبك أول ما رجع مصر عمل مؤتمر صحفي .. في واحد من الصحفيين قام سأل حسني مبارك قال ليه هل يستطيع الجيش المصري التصدي لسلاح الطيران السوداني ؟؟ حسني مبارك بعد ضحكة خبيثة كده قام رد عليه بي لهجتم قال ليه ( ده كل اللي عندهم طيارتين .. واحدة راكبها عمر البشير والتانية معلأنها قمب الهيلتون)

أحمد بن عوف
شكرا على جلدنا بالواقع ياخ.. لعلنا نستيقظ قليلا..
تفتكر لو كان في وعي عند الشعب ده, كان ممكن يشتغلوا بنفرين, مهما كان حجم النفرين ديل, إتشاكلوا فيما بينهم؟؟
ما ظنيت.. لكن لأننا شعب لسه - ما بدا - حولناَها طوالي لي مشكلة قبلية وإستعلاء عرقي.. وإتحولو نفرين عاديين لي مشاهير في بلد, أشهر ناس فيها هم الحرامية والناس النص كم والفاسدين..

أمل الشعب في الشباب الذي عمك تنقو ده.. فيهم هم, وما فينا نحن.. نحن خلاص رمينا طوبة البلد ديك.. لكن هم لسه, شايلنو جواهم وبعملو عشانو.. ديل هم الأمل..



يا محمد جبريل..
عبارة حسني مبارك دي قفلتا معاي قفلة شديييدة خلاص..
عليك دينك الناس دي لو كانت فعلا ذي مابتقول.. عساكر ودمهم حار ورجال, ما كانت العبارة دي خلتهم يقاطعو مصر دي لحدي ما يبنو جيشهم - على الأقل - أو - على الأقل برضو - يبطَلوا يدَخلونا في الحتات الضيقة دي, بحركاتم النص استوا دي..؟

الله يرحم نزار قباني..
"وجعي يمتد كبقعة زيت من بيروت إلى الصين"
ونحن أوجاعنا تمتد عبر كل شبر من المليون ميل مربع..

ما عندي حاجه ازيدها بس ياريت يا ابنعوف خريطك السمحه دي تشوف لينا واحد من عباقرة كلية الفنون يهندسها لينا تمام ،
فعلا الفنون تختصر كثير من القول والتفصيل
يا ريت تتم جميلك وتطور الفكره

شكرا شكرا شكرا

اقتباس: المشاركة الأصلية كتبت بواسطة hatim..     أحمد بن عوف شكرا على جلدنا بالواقع ياخ.. لعلنا نستيقظ قليلا.. ..

تشكر اخي حاتم على الاضافة القيمة للبوست

اقتباس: المشاركة الأصلية كتبت بواسطة محمد المعتصم ابراهيم     ما عندي حاجه ازيدها بس ياريت يا ابنعوف خريطك السمحه دي تشوف لينا واحد من عباقرة كلية الفنون يهندسها لينا تمام ، فعلا الفنون تختصر كثير من القول والتفصيل يا ريت تتم جميلك وتطور الفكره شكرا شكرا شكرا

اخونا محمد المعتصم

تشكر على التشجيع، انا عارف انا ما زول رسام وخطي زي ما انت شايف.

الحاجة المحيراني، وزي ما قال اخونا فابيلوس، مؤتمر شنو كده ما عارف العاملين بالخارج، قالوا ودوهم يتفرجوا في سد مروي، لييه ما بودوهم الحتات الفيها الموت والقتل دي.

يعني هم الخواجات غبيانين من خريطتي دي، يقولوا ليك غريشن جاء واوباما فصل وانبرش لناس البشير، اوباما وغريشن كل يوم الصباح بوروهم جنس خرايطي دي، واشارط لو يوم شاف صورة سد مروي.

قال ايه يعكسوا التطور الحقيقي في السودان، يعني امشوا كذبوا، التطور الوحيد في السودان هو زيادة عدد القتلى وزيادة المساحه التي يستغلها المقاتلون.

وعلى العلينا ناس الاعلام بالداخل، ياها بس سيرة بشرى الصادق ضرب وليد مادبو