صنع في السودان: طيارة .. توجد صورة ..

يا جماعة انا ما زول متخصص في مجال هندسة الطيران .. لكن قريت في كلية الهندسة وكان جمبنا قسم هندسة الطيران وشفنا المجسمات والهياكل والمحركات .. يعني شقينا المقابر .. طيب يا جماعة حسب الشايفينو دة باقيلكم ( البتاعة ) دي ممكن تطير .. !! ؟؟

والله يا اخوي ماعارف

لكن في طيارات رش واقعه فتشوها لسه في ولا باعوها سكراب؟

الصديق فاب
اتمناك في اتم الصحة

طيارة وكمان سودانية الصنع!!!!!!!!!

شراء تذكرة يعني شراء مقبرة ان وجد لو ما بقي رماد عديل كدا

العام الماضي كنت موجود في الخرطوم يوم حدث فيه حريق الطيارة
و ما تبعه,,, من ضمن ركابها صديقي ذو حظا عظيم

بالجد,, ده خطوة ممتازة لكن لازم يجربوه ذي 10 سنة كده
كbuilding confidence في الجراد او غيره من الافات الزراعية عشان نقيس فعاليتها وكده

دا غسيل اموال يا عمك

انسى

الله يا جماعه خبر صنع الطياره دا عجبني وفرحني أني أشوف على قناة عربيه أن السودان بيصنع طيارات!!!
ودا شي طبيعي أفرح لبلدي.

لكن شعرت بمراره لمن شفت البشير امبارح بيخطب في الجماهير البتهلل وتكبر
وبقارن بين الإنقاذ وقبلها, عدد محاسن كتيره حصلت في البلد والقالو امكن يكون كله صح

لكن نسى مآسي كتيره وناس كتيره دفعت ضريبة الهاله الإعلاميه الكيزانيه ولو النناس دي كانت جاده في رفعةالوطن, وهمها الشعب المقطع كان بدت بالصحة والتعليم الكلو يوم ماشين لأسوأ من جات الإنقاذ


وربنا يصلح حال بلدنا

طيرررررري ....
طيري يا طيااااااارة ....
وطن حدادى مدادى............
مابنبنيهو فرادى
لابالضجه فى الرادى
ولا بالخطب الحماسيه

اعتبرو الطيارة دى طارة بى
ووقعتنى هنا وهسع انا شهيد الايصالات اقصد صافنات
ده هو المقابل لصناعة الطيارة حقو نجمة الانجاز يدونا ليها نحن
http://www.newsudan.org/vb3/showthre...ed=1#post75774

اقتباس: المشاركة الأصلية كتبت بواسطة مصطفى شوقار     الصديق فاب اتمناك في اتم الصحة طيارة وكمان سودانية الصنع!!!!!!!!! شراء تذكرة يعني شراء مقبرة ان وجد لو ما بقي رماد عديل كدا العام الماضي كنت موجود في الخرطوم يوم حدث فيه حريق الطيارة و ما تبعه,,, من ضمن ركابها صديقي ذو حظا عظيم بالجد,, ده خطوة ممتازة لكن لازم يجربوه ذي 10 سنة كده كbuilding confidence في الجراد او غيره من الافات الزراعية عشان نقيس فعاليتها وكده

الاخ العزيز مصطفى شوقار

زمان كان وفي فترة من الفترات ما في غير سودانير للسفر بين لنـــــــــدن والخرطوم وطبعا مواعيد سودانير معروفة (دقة في المواعيد)

اها الخواجات والانجليز زهجوا ليك من تأخير سودانير الكثير في السفريات وطبعا اختصار سودانير بالانجليزي هو (SD).

الجماعة(الخواجات) قاموا طلعوا نكته انو الشعار بتاع سودانير ده يعني الآتــي:


(SURE DELAY) والاختصار هو (SD)

كن بالف خير

اقتباس: والله يا اخوي ماعارف لكن في طيارات رش واقعه فتشوها لسه في ولا باعوها سكراب؟

والله يادكتور لو عندهم فكرة يشغلوا لينا طيارتهم دي في الرش فابشـروا بطول سلامة ياجراد ويا جنادب ..

مشكور يا صديقي شوقار على الكاريكاتير المعبر تماماً عن واقعنا .. وهاك دي قصة تحكي واقع حال الطيران عندنا .. وما تتفاجأ كتير من حجم التشابه بينها وبين حالتنا ..



نصح الأطباء (الحاج سليمان) بالسفر إلى الخارج لإجراء بعض الفحوصات ، بما أن (الحاج سليمان) من الرعيل الأول الذى عاصر الحركة الوطنيه وشارك فيها بصفته كان أحد (عمال السودان) فقد إختار (الناقل الوطنى) إذ أعتبر أن إختياره لأى (خطوط طيران ) أخرى يعد عملاً يفتقر إلى ادنى مستويات (الوطنيه) ، لم ينس حاج سليمان عند مغادرته منزله ووداعه لأبنائه أن يقوم بتسليم زوجته (قروش المعيشه) خلال فترة غيابه وأن يدس فى يدها بعض (القريشات) لزوم الإستعانه بهم عند إقامة (ليالى المأتم) ، توجه سليمان إلى مبانى الخطوط وقف أما موظف الحجز الذى قام بتزيين مكتبه بصدر الحكمة التى تقول (ما طار طائر وإرتفع) :
- والله يا إبنى عاوز ليا حجز (الليله) ماشى الأردن إتعالج
- والله يا حاج عندنا الليله سفريه وااحده (عمان)
- مطار أربعه .. إقلاع سته .. (دفن) أقصد وصول تسعه !!
- طيب خلاص أقطع ليا ماشى وجاى !!
- (شخص خلفه) : يا حاج أحسن تقطع ذيى كده بس (ماشى) عشان (الورثه) يستفيدو من (الجاى) دى
- (غير مهتم لما سمعه) : خلاص يابنى أقطع ليا ماشى وجاى !
- طيب يا خال إنت عاوز مقعد إستواء ولا نص (إستواء)
- مش فاهم !
- لا يعنى أنا بقصد إنت عاوز مقعدك قريب من أبواب النجاة ولا بعيد منها
- أكيد قريب منها.. وإلا أقول ليك (مافى حاجه أحسن؟)
- والله إلا نحجز ليك (مقعد الكابتن) !

بعد أن قام موظف الحجز بتسليم (سليمان) التذاكر اشار عليه بالذهاب إلى (كاونتر) أخر مكتوب عليه (السلامة الشخصيه) ، طلب الموظف من (سليمان) التذكرة التى فضاها أمامه ثم خاطبه قائلاً :
- شوف يا حاج كل مسافر على خطوطنا دى أنحنا لازم نتأكد من سلامتو
- والله دى الخطوط وإلا بلاش
- عشان كده لازم كل راكب يشيل (أنبوب) الرغوة بتاعتو معاهو
- ومالو يابنى نشيل
- تشيل ساااكت لكن إنت عارف الأنبوبه بتاعت الرغوة دى بى كم
- يعنى ما مع التذكرة يعنى بى قروش؟
- أكيد بى قروش يا حاج هو نحنا مسئولين من سفرك وإلا من سلامتك قالو ليك
- كيف يعنى؟
- أفهمك يا حاج .. الطيارة دى مش ممكن تقع فى البحر؟
- ممكن
- أها يعنى نصرف لى كل راكب (قارب نجاة)
- طبعن لا
- أها والطيارة دى مش ممكن تتعرض لى عمليه (قرصنة) أو إرهاب أو عصابه تختفا
- ممكن
- أها يعنى نصرف لى كل راكب مسدس وسكين
- طبعن لا
- والطيارة دى مش ممكن تنزل أضطرارى فى الإسكيمو
- ممكن
- يعنى نصرف لى كل راكب بالطو وبطانيه
- طبعن لا
- والطيارة دى مش ممكن تتعرض فى الجو لى ضغط عالى والشباك بتاعا ينشق
- ممكن
- أها يعنى نصرف لى كل راكب (مكنت لحام)
- طبعن لا
- الحاجات دى يا حاج مش كلها ممكن تحصل ؟
- أها يا إبنى يعنى عشان سلامتى أنا هسه أشترى منكم شنو ؟ إنبوبة رغوة ولا قارب نجاة ولا بالطو وبطانيه ولا مكنت لحام ولا مسدس وسكين ؟
- والله يا حاج لو عاوز تضمن وصولك سالما غانما تشترى (الباقه) دى كلها وح نعمل ليك عليها تخفيض و نديك ليها بى سعر معقول
- أقول ليك حاجه يا بنى ؟ ما عندكم (باراشوتات) ؟
- الباراشوتات فى يا حاج لكن المشكلة إنك بعدين تطلع بى وين؟
أقتنع الحاج بكلام موظف مبيعات أدوات السلامة الشخصيه حيث عدل عن (الباراشوت) وقام بإقتناء أنبوبة (رغوة ضد الحريق ) ، وبعد أن قام الحاج بحمل الأنبوبه أشار عليه الموظف بالمرور على كاونتر (وصايا المسافرين) حيث قابله الموظف مبتسما وهو يسأله :
- يا حاج وصيتك دى عاوز ناس البيت يستلموها بالسريع ولا عادى ولا بالنت ؟
- والفرق بيناتم شنو؟
- بالسريع يعنى ح يستلموها قبل ما تبقى (فحمة) يعنى قبل ناس المطافئ ما يطفو النار (بالمويه) وعادى يعنى عادى بعد ما تمشى المشرحة ويتم التعرف عليك والشغلانيه تطول
- طيب ده كلو عرفناهو قصت (بالنت) دى شنو؟
- أيوااا بالنت دى يعنى إنت بس تدينا الوصيه والإيميل بتاع ناس البيت ومع (الوقعه) طوااالى نرسلا ليهم بالإيميل
- والله يا ولدى (تكنولوجيا الكوارث) ما عندكم !
- وبعدين يا حاج فى حاجه مهمة لازم توضحا فى الوصيه بتاعتك دى؟
- اللى هيا أيه يا إبنى
- اللى هيا يا خال إنك لازم تكون (عارف) منو الح (يستلم) التعويض من (أحفاد أحفادك) ! إنت قايل يعنى سمونا (عارف) كده ساااكت ؟

اقتباس: دا غسيل اموال يا عمك انسى

مابعيدة والله يا بن عوف ..

تعرف .. الشغل دة عملوه بالتعاون مع أكاديمية ( هاي ليفيل ) وهي اكاديمة خاصة جداً للنخبة تابعة على ما أعتقد لمطار الخرطوم .. وهي أكاديمية متخصصة لعلوم الطيران وشبه حصرية للمحظيين من أبناء السودان الما غبش ..
لكن عارف رسوم الدراسة فيها كم ..؟؟

120 مليون جنيه سوداني للطالب الوااااااحد .. آي والله مية وعشرين مليون جنيه للطيران الخاص .. ومية وستين مليون جنيه للطيران التجاري ..

اقتباس: الله يا جماعه خبر صنع الطياره دا عجبني وفرحني أني أشوف على قناة عربيه أن السودان بيصنع طيارات!!! ودا شي طبيعي أفرح لبلدي. لكن شعرت بمراره لمن شفت البشير امبارح بيخطب في الجماهير البتهلل وتكبر وبقارن بين الإنقاذ وقبلها, عدد محاسن كتيره حصلت في البلد والقالو امكن يكون كله صح لكن نسى مآسي كتيره وناس كتيره دفعت ضريبة الهاله الإعلاميه الكيزانيه ولو النناس دي كانت جاده في رفعةالوطن, وهمها الشعب المقطع كان بدت بالصحة والتعليم الكلو يوم ماشين لأسوأ من جات الإنقاذ

سلام يا أبو حميد ..
والله كلنا بنفرح للسمح وبنفرح لرفعة شان بلدنا .. لكن الناس ديل شغلهم زي ما قلت كله عشان الكسب الإعلامـي الوقتي السريع بدون التفكير في العواقب .. ودونك ما حدث في سد مروي من سربعة من أجل الافتتاح السريع واهمال الجوانب الهندسية وما أدى اليه هذا التعجل من اختلال في انتاج الكهربا لا زلنا نعاني اثاره الى هذه اللحظـة .. كمان معروف انه كل الدول التي تفشل في مجال التنمية والانجاز الحقيقي في مجال الانسان تلجأ الى مثل هذه المشاريع الدعائية من أجل ذر الرماد في العيون .. هسة عليك الله نحن محتاجين طيارات رش ولا مجاري لتصريف موية الخريف الجاي العـلى الأبواب دة .. ؟؟
وهل يعقل لدولة تستورد الركشات والعجلات من الهند والتياب والجلاليب والتوم من الصين .. والنبق من ايران .. اي والله النبق الفارسي يغزو اسواق الخرطوم .. ونستورد حتى ملابسنا الداخلية من مصر .. ونغرق في شبر موية من أول رشة مطرة خفيفة .. وملايين السودانيين نازحين تطعمهم المنظمات الكنسية واليهودية وأصحاب الأيادي البيضاء والعيون الزرق .. هل يحق لدولة بمثل هذا التردي ان تتحدث عن ( تجميع الطائرات )
غايتو ربنا يلزمنا الصبر سااااكت ..

اقتباس: اعتبرو الطيارة دى طارة بى ووقعتنى هنا وهسع انا شهيد الايصالات اقصد صافنات ده هو المقابل لصناعة الطيارة حقو نجمة الانجاز يدونا ليها نحن

هاك ياسيالي شوف التفتيحة دي ..

عروس سودانية تطلب الطلاق لأن العريس حجز لها على سودانير

الخرطوم: من حسن جاكات
طلبت عروس سودانية الطلاق من عريسها الذي يقيم بإحدى عواصم الدول الخليجية،
والسبب في ذلك أنه حجز لها مقعداً على شركة الخطوط الجوية السودانية (سودانير)،
متهمة إياه بأنه لا يحبها وأنه أراد بذلك التخلص منها ليرتبط بخطيبته الأولى.
وكان من المفترض أن تسافر العروس إلى عريسها لقضاء شهر العسل معه حيث يقيم،
ولكنه اضطر أخيراً لأن يطلقها تحت إصرارها وتصميمها، بعد أن باءت كل محاولات الأجاويد
من أهل العريس وأهل العروس لإثناء العروس عن طلبها..
العريس عبر عن دهشته لما حدث وصرح بأن ما ادعته العروس لم يخطر بباله أبداً، لأنه
حجز لها على سودانير مضطراً بعد أن فشل في الحصول على تذكرة من شركات الطيران الأخرى
وكذلك لضيق الوقت لأن التأشيرة التي أرسلها لها تبقى لانتهائها أيام قلائل ولابد من أن
تسافر العروس في أقرب فرصة..
يذكر أن العروس كانت تجد تأييداً ودعماً كبيريْن من أمها التي أوضحت بأنها لن تُلقي
بابنتها الوحيدة إلى التهلكة وهي جاهلة وصغيرة وما شافت في الدنيا حاجة..

اقتباس: المشاركة الأصلية كتبت بواسطة Fabulous     مابعيدة والله يا بن عوف .. تعرف .. الشغل دة عملوه بالتعاون مع أكاديمية ( هاي ليفيل ) وهي اكاديمة خاصة جداً للنخبة تابعة على ما أعتقد لمطار الخرطوم .. وهي أكاديمية متخصصة لعلوم الطيران وشبه حصرية للمحظيين من أبناء السودان الما غبش .. لكن عارف رسوم الدراسة فيها كم ..؟؟ 120 مليون جنيه سوداني للطالب الوااااااحد .. آي والله مية وعشرين مليون جنيه للطيران الخاص .. ومية وستين مليون جنيه للطيران التجاري ..

القروش بتاعت القراية بدفعها ليهم التنظيم، ورسوم زي دي عشان الضهبانين ما يجوا يحوموا جنبهم. وهي اساسا قد لا تكون حقيقية، كده بس تعاين بعيونك وتشتت.

لكن ما قصدته انا بالاضافة الى ما قلته انت، التعاون مع جهات وشركات "خاصة" القصة وما فيها عبد الرحيم محمد حسين ح يقدم فاتورة بي زي خرتمية مليون دولار لوزارة المالية (طبعا ما حقيقة) بكون صرف اقل منها كتير، طيب لييه اللفة الطويلة دي؟؟

اولا الشريك المسكين (الحركة الشعبية) بحساب نيفاشا بكون مساهم في الطيارة دي (اسما فقط) يعني من استحقاقاتهم في البترول بكونوا بتفرجوا على الطيارة دي زينا وهم دافعين حقها

دي الحاجة الاولى

الحاجة التانية هو داير يطلع اموال من النظام المصرفي السوداني بطريقة "قانونية" عشان يمول بيها حاجاته الخاصة "المؤتمر الوطني" وقد يمول بيها حاجات تانية زي شراء السلاح للجنجويد مثلا او النوير لكن السلاح دا مما ممكن فاتورته تعدي من وزارة الدفاع لانها تخص تمويل عمليات "قذرة"

عشان كده اسمها غسيل اموال، الليله سد، بكره كبرى، بعدو طيارة، ما عارف المرة الجاية ح يعملوا شنو وبرضو يملصوا مننا قروش، شيء ضرائب شيء عدادات، هسه شوف ود السيالي دا عامل كيف.

الطامة الكبرى التي سيتفاجأ بها الشعب السوداني، انه في يوم من الايام ح نصحى من النوم ونكتشف انه مجمع صافات دا ليس ملك لحكومة السودان (في زول شاف ورقة بتقول انه المجمع دا ملك لحكومة السودان؟؟) بل هو ملك لشركة زي القلتها او اي بلوه تانية.

وبالمناسبة عندي شعور قوي بقول لي انو سد مروي زاتو ليس ملك لحكومة السودان

السودان مش يصنع طيارة ,كم صنعت له ابرة ما يطلع نقرة ابرة.

اقتباس: المشاركة الأصلية كتبت بواسطة أحمد ابن عوف     عشان كده اسمها غسيل اموال، الليله سد، بكره كبرى، بعدو طيارة، ما عارف المرة الجاية ح يعملوا شنو وبرضو يملصوا مننا قروش، شيء ضرائب شيء عدادات، هسه شوف ود السيالي دا عامل كيف. eek:

ود ابن عوف
خيالك مرات بكون واسع شديد "بتشتري البتاعات من وين؟"
لكن المرة دي وجهة نظرك منطقية جدا.. وبتدعما تجربة
السد.. الرد الرد..


لكن ود السيالي ده الجابو هنا شنو؟
يكون عندو نسبة في الطيارات دي ولا شنو؟

اقتباس: المشاركة الأصلية كتبت بواسطة Fabulous     طيب يا جماعة حسب الشايفينو دة باقيلكم ( البتاعة ) دي ممكن تطير .. !! ؟؟

يا فاب
غايتو الطيران البنعرفو ده, ما ظنيت..
لكن العارفو إنو في ناس طلعتَ من ورا "البتاعة" دي بي ملايين مملينة.. وحتما "طارت" وركت في
ماليزيا ولا سويسرا..

يا اخواننا القضية دي صورة في طيارة وللا طيارة في صورة ؟؟؟

اقتباس: المشاركة الأصلية كتبت بواسطة hatim..     ود ابن عوف خيالك مرات بكون واسع شديد "بتشتري البتاعات من وين؟"

يا زول انت ما خبروك، حجم تجارة البنقو في السودان العائد بتاعها اعلى من البترول زاتو

بعدين الايام دي قاعد عزابي، عشان كده قصص الطيارات والمطارات دي بتعمل لي كاروشة

اقتباس: المشاركة الأصلية كتبت بواسطة hatim..     لكن ود السيالي ده الجابو هنا شنو؟ يكون عندو نسبة في الطيارات دي ولا شنو؟

كيف ياخي، ود السيالي دا الممول الاساسي بتاع المشاريع دي كلها

صحى الصباح ظبطوهو ليك ايصال (حركة ارضية) بمية الف عشان يمول مشاريع (حركة جوية)

ودفعوهو ليك 4 مليون تمن عداد كهرباء عشان السد والرد والافلام دي.

تلقاها في ميزان حسناتك يا السيالي

شخصيا بقت عندي حساسية من اشياء ناس الانقاذ البقولوها دي

صناعة الطيران ليس امرا دعائيا او عملا سياسيا. هل لدينا قدرات تصنيع حقيقية ... اجهزة كمبيوترات ... ضبط .. اختبار.. مش تجميع صفيح .. حديد و ماكينة.

ايام الانقاذ الاولى كنت بحبها شديد و كنت في بورتسودان والحاكم العسكري الحسين عبدالكريم عمل جوطة شديدة عن صواريخ ... المدينة كانت تتحدث ان الدفاع الجوي جمع صواريخ ... وجاء البشير لاحتفال ضخم جدا
ومن الخطب فهمت ان الصواريخ دي قديمة في المخازن و الروس صنحوا الحكومة ترميها البحر ولكن (ابطالنا الاشاوس) اصروا ان يخرجوها من المخازن و يجربوها امام الرئيس ليثبتوا قدرتهم و انتماءهم للانقاذ.