يا قناة النيل الأزرق يا.....!

ده بوست قديم, كتبتو في منتدى مجاور, والنيل الأزرق وقتها لسة مراهقة..

هدية لأخونا أحمد, وكوكو, وبقية الشرفاء..

البوست كان بعنوان:
يا نجوم الغد يا..!

نسمة في الزمن العذاب..

وفي رواية أخري:

ضُلَالة هجير الصيف..





سأعود لأتعاطى شيئا من الفرح هنا.. سأتعاطاه جهرا..لا وجل ولا هياب..
" لحدي ما أقيف لمبة " ..
وفي رواية أخري..
" قصبة " ..

والدعوة عامة لجميع " الطشمنجية ", وممنوع دخول " السادة المهذبين"..
بالعربي الفصيح:
" ماعايز أشوف لي زول مهذب مضهب بي جاي!!"
بس عشان ما " يفكها" لينا..
نحن ماصدَقنا " ربطناها "!!

والمهاجرون يبدءون يومهم بنجوم الغد.. ويختمونه بهم....
وهم فيما بين ذلك يحجون إلي بقاع طاهرة في الوطن..!


وحيث أننا - في أرض الله هذه - نعيش أيام عطلة مملة, فقد عزم علي بعض الأصدقاء أن أشاركهم في "قعدة", فقلت نعم..
وهل مثلي من يقول لا ?!
حاشا لله, بل أجزم أنني ممن يقولون علي الدوام, هل من مزيد..

وصلت المنزل في حوالي التاسعة مساء, فوجدت " المزَة ",وقد أُعدت أو كادت,,
"عصيدة بي ملاح شرموط ", زعموا أن "كابلي" قد غني لها..!
والذين زعموا أولئك, هم رفقة جميلة, بعضهم أكمل الأربعطاشر سنة غربة, أكرمه الله فيها بهوية, لا يُضام حاملها..!
ومنهم مادون ذلك, وما بدلوا تبديلا, جمعنا الله بهم في براري كندا, " قولو آمين.."

ثم أشتغل الدي في دي DVD, وأنتقلنا " بقدرة قادر "من هنا, إلي هناك..

وأطلت " مي " للمرة المليون, ولو كان غيرها, لخرج علينا من الشاشة,وأمسك بخناقنا, يشتمنا,
" قومو يا سكارى, عذبتونا معاكم زاتو !!" ,
ولكنها شيء آخر, وتغني شيئا آخر!

غنت لكابلي, ويا سبحان الله, يغني "كابلي" علي "مزتنا", وتغني "البت" لجميلة بو حريد ولجيش التحرير!!
وعجبا لها, فقد دخلت بنا فجأة إلي حضرة مولانا يزيد بن معاوية,,
ولا تغر بنا من رام منا وصالا مات بالكمد!
وأعترف أن "الطشمة" قد بلغت بي حدا, نسيت معه الوقار وأحكام السن والــ " دعوني أعيش ", فطفقت " أسكسك " ..
فسخر مني بعض الرفقة..فقلت لهم كما قال شيخنا قديما: كل كريم طروب..!




نواصل..
"على رأي د. وفاء"..

قلت ما داير مهذبين

وآدي قعدة

اقتباس: المشاركة الأصلية كتبت بواسطة أحمد ابن عوف     قلت ما داير مهذبين وآدي قعدة

الناس المهذَبين ديل بعملو لي "كاروشة" في الأعصاب..



خليك قريب وكتَر من "القعدات"..

حاتم ,, مليون سلام ,,

أني اشتم رائحة انحراف
ولا بد من الانصراف ,,

وها دي توهيطه ومعاي جك مليان بلاوي زرقه
بس زحو لي فلان دا من جنبي - ريحتو سمك !!! ,,

أي صوت زار بالامس خيالي ,,

&feature=related

اقتباس: المشاركة الأصلية كتبت بواسطة hatim..     الناس المهذَبين ديل بعملو لي "كاروشة" في الأعصاب.. خليك قريب وكتَر من "القعدات"..

حلوين إزيكم وأعلمو لينا ضروة بالله نتاوق بيها معاكم

اقتباس: المشاركة الأصلية كتبت بواسطة محمد عبد المجيد     أني اشتم رائحة انحراف ولا بد من الانصراف ,, وها دي توهيطه ومعاي جك مليان بلاوي زرقه بس زحو لي فلان دا من جنبي - ريحتو سمك !!! ,, ,, [d[/url]

مولانا محمد بن عبد المجيد رضي الله عنه, بذات نفسو..
ومعاهو مي عمر ذااااتا..

ياخ الغنية دي نحنا من كتر ما سمعناها, لمن الدي في دي ذاتو "اتسهك"..

اقتباس: المشاركة الأصلية كتبت بواسطة الفنجرية     حلوين إزيكم وأعلمو لينا ضروة بالله نتاوق بيها معاكم

البنية الفنجرية
طالما بتلتزمي بالشروط الفوق ديك.. ما عندك مشكلة..

بوست متضارب القوى القطبية ومشتت للمجال المغناطيسي

ثم إنني, ومن هذا المكان, وبكامل "طشمتي", التي أسأل الله أن يُديمها علي, وأن يكفني وإياها شر الناس المهذبين.. أعلن عن احترامي وتقديري للذوق الرفيع والنظرة الثاقبة, التي يتمتع بها مخرجي قناة النيل الأزرق!
هذا رغم مزاعم رفيق لنا, حديث عهد بالغربة, والذي أكد لنا أن "الكُسَار المظبوط", علي وزن " الشاي المظبوط",غالبا مايتواجد في الصفوف الخلفية, لأنه يُفضَل " الونسة الدُقاق ", أو كما زعم!

وكان صديقنا عبدالله أنصار السنة "كم طويل سابقا, نص كم حاليا" , كان قد أخبرني عن جلسة "ونسة دُقاق", جلسها في كافتيريا كلية الإقتصاد بالنشيشيبة, جامعة الجزيرة,ناهزت العشر ساعات,
فآمنت!!

فك الله أسره ورد غربته, فمازال هناك, في الخرطوم أعني!
ثم هلَت " البت اللابسة أخدر دي ", والتي صدحت برائعة المرحوم صلاح محمد عيسي, "أنا بهواك", وللبنت من عالي الإحساس, ما جعل مستوي "الكحول الطربي" يصل في دمنا, إلي نسب لا يجوز لنا بعدها المشي, ناهيك عن القيادة!!
قلت للرفاق, أن هذه البنت لابد أنها قد فازت,, فتدخل القادم الجديد وقال لا, بل فازت بها مي!

ولم أغضب, ولكنني "مع طشمتي ديك" ,أعلنتها فائزة, وشربت "في صحتها", ما تبقي في قعر الكوب من سائل, كان قد أصبح ثقيلا, كُشري أو صاموتي عديل, إذ أنني نسيت أن أنتشل عبوة اللبتون منه!!
وختمنا ال Cd الأول بأغنية جميلة:

إلا عشان عيونك ده كلو يهون علينا..

تردد البنت المقطع وترفع سبابتها في وجوهنا!!

يقال أن يزيد بن الوليد "إن لم تخني الذاكرة" , كان يأمر ببركة في قصره فتُملأ خمرا, ويأمر بالمغنية فتغنيه, حتى إذا طرب, وقع في تلك البركة, فشرب منها حتي يتبين منها النقص, ثم يخرج!!

وهكذا كان مقدار النشوة عندي..






ونواصل..
على رأي د. وفاء..

اقتباس: المشاركة الأصلية كتبت بواسطة د.أحمد الفاضل     بوست متضارب القوى القطبية ومشتت للمجال المغناطيسي

أنا غايتو يا دوك كلامك ده ما فهمتا منو "الفسكة" دي, لكن لو قلتو لي أي واحد "مُسخَف", ممكن يحترمك أسبوع..

وأصابنا الجوع فجأة, والأخوة "الطشمنجية" يعلمون أن "الشربة" مما يفتح الشهية للأكل! فاضطررت للنزول من الطابق الخامس لجلب بعض الأشياء, علي أن يعد رفيقنا "مزة" أخري, هذه المرة "رز بي لبن"!

وعبرت الزقاق الضيق للمرة المليون, ولكنني شعرت هذه المرة وكأنني أعبر أحد أزقة "سعد قشرة"! فأدركت أن من الخطورة بمكان, أن أعبر بهذا الوقت وأنا علي تلك الحال, فقفلت عائدا!!

عدت لأجد أحد الرفقة مصرا علي الانتقال بنا لبلاد الملك الذي لا يظلم عنده أحد ,البلاد التي تحبنا ونحبها!
فتصديت له بحسم, مُذَكرا إياه بالقاعدة الفقهية: إذا حضر الماء بطل التيمم!
فآمن وصدق, وكفاني -لله دره- مشقة القتال دون حرم النور!
ومثل هذا الصوت لا يتكرر كثيرا, ولا توسوسن لكم أنفسكم بأنني "زول طاشي ساكت",
فإنني, وإن كنت طاشا, إلا أنني ضليع في علم الأصوات!
وأشهد أن الأمة السودانية لم تأت بصوت يعادل أصوات حنان النيل وسميرة دنيا, والآن..حرم النور, وأظنها ستعي قريبا أن صوتها أرفع شأنا من أن تقلد به ندي القلعة, ويومها, أيها السادة الطشمنجية, أبشروا بأنهار لا تنفد من المتعة,
"أبشروا سااااي"!
وأعجبتني في
"يا زولي ماك هين",
ووقفت علي قدمين مهزوزتين, محاولا جاهدا, أن "أركز", حين تغنت ب
"الفارس أخوك يا الزينة"
ولما فشلت محاولاتي جميعها,جلست, مُقنعا نفسي أن زمان الفرسان قد ولي, وقلت كما قال "بتاع فرقة همبريب داك" :" أنعل أبو السرة زاتو"!

وأعجبتني أيما إعجاب , ما غنته علي لسان سيدة كبيرة," حبوبة" ربما,
زمان كان والدك يعاكس ل تقري لا تدخلي المدارس سمح العرس سمح الشهادة...
وكدت والله أقف وسط الجمع وأهتف بملئ صوتي:
كلاااام يا عوض دكام!
ولكنني كنت قد بلغت من "الثمل" حدا, أستعصي علي فيه النهوض, فاكتفيت بالترحم علي روح عوض دكام, وعلي روحي, التي خيل إلي أنها تحلق في أجواء الخرطوم, فأيقنت أن "الطشمة" قد بلغت بي ما بلغته بالشاعر حين قال:

شربناها فلما دب دبيبها إلي موطن الأسرار.. قلت لها قفي!

وبعد أن ظننت - آثما - ألا مزيد علي هذه النشوة, غنت نجمة أخري:
من بعد ما فات الأوان.. الليلة جاي تعتذر
وترجع أيامنا الزمان.. من وين نجيب ليك العذر

وتسألني أنا?!
أنا القابع في هذا "الكورنر" البعيد!!
يا ليتني امتلكت الإجابة, إذا
" لكفيتك العبرات..هديت بالك للصراط المستقيم"
ثم ختمت بـ:
ألقي الدنيا فرحة لما أجيك تايب
يكفي رضاك لمحة يا أغلي الحبايب

فتركتنا بين جريح وقتيل, ولا جناح عليها, ولا دية!!

ثم تلاها سعد, فرأيت أحد الرفاق وقد تحرك تجاه الـDVD, معلنا - بحنق - أنه أنه "حيَجر طمبور الشايقية"!!
فتصديت له ,وكدنا نقتتل دون مبادءنا!
ثم خطبت فيهم خطبة عصماء,قلت فيها - ضمن ما قلت - أنني, وعلي مقتي العظيم لعلي عثمان وأبو الجاز وأمثالهما, والذي هو قُربى أتقرب بها إلي الله, إلا أن محبتي لبني وبنات شايق, مما لا يقبل النقاش!

لقد ثُبتَت في القلب منكم محبة.. كما ثبتت في الراحتين الأصابع..!

فسكتوا علي مضض, ولعل مما دار في خلدهم الخبيث وقتئذ, أنني وفي غمرة "طشمتي" تلك, قد "إرتكبت" مكنة شايقية!!
غفر الله لهم..


وشدا سعد بـ "حبي ليك كان زادي", ولكنه - هداه الله - قد "ساقا سواقا شديدة خلااس" , فلم أجد والله بدا من أن أسافر بخيالي إلي الوطن الأول, وبيتنا الصغير فيه, ورفقتي صديقنا عبد الله نفسه, والـ amplifier الما خمج, يرسل علينا فيضا من "عبدالرحيم أرقي" , ونحن نحاول جاهدين فك طلاسم هذا الكنز الجديد..

كنا حينها قد فرغنا لتونا, وللمرة الألف, من تفكيك البنية التحتية للـ "الطير المهاجر" وانتهينا بـ "وردي" وردة في قلوبنا!!

وهكذا سادتي, وجدتني متنقلا بين وطني الأول هناك, ووطني الثاني هنا, والوطن, حيث يمارس صديقنا عبد الله تشرده الأنيق ,بين ظهراني "الجماعة", رد الله غربته وفك أسره وأعاده إلينا سليما معافى, غير مفتون في دينه, وغير مصاب في عقله, قولوا آمين...

وكنت قد شهدت في "قعدة" أخري, جدلا حول أن البنت التي كتبت القصيدة أعلاه قد "إنتهت منه" أي الحبيب!
فشرحت لهم أن البنت لم تقصد الحبيب ,بل قلبها! فجادلوني, ونحن أمة مجادلة!!
حتي أعدنا الأغنية "بيان بالعمل" ,فتبين لهم أن لو كانوا يعلمون!!
ولو استقبلت من أمري ما استدبرت, لقلت لهم مثل ما قالت البنت الأخرى:
والقليب كان راد وحبا.. تاني ما ظنيت يعادي


ثم غني أحد الفتية, شيئا من المرحوم "سيد خليفة"
ولـ "أبوالسيد" في قلبي جناح خاص, لا يدخله إلا هو! ويعجبني كل من غني ويغني له, إلا المدعو "بكري المغربي" والذي ابتلاني الله بأن سمعته يوما يخرمج بـ "الوحيد" فأرتفع عندي الضغط!
وأجزم أن الفتي قد بذل ما في وسعه, وأتمني لو نصحه ناصح بألا يقتل أغاني أبوالسيد بالبطء المحبط هذا, فقد كان ,رحمه الله, يحبها علي سجيتها ,حرة, متمردة و"مطلوقة",وهكذا نحبها نحن!

امتعتنا يا حاتم بالكتابة البتسكر دي

ياخي ريحتكم طاقه للسما

لكن لو اصلها قناة السجم دي ما بتلم الا ناس السجم الحلوين زي ناس حاتم

فما عندنا مانع انها تواصل في شغل اولاد الشوارع

على ان يواصل حاتم كتاباته الممتعه

الولد المهذب حتومي

سقاك ربك شراباً طهوراً

لقد زاد الظمأ .... و لم تبتل العروق بما نضح من مزمزاتك

تجلي ها هنا .... أسرح و أمرح ... و أسكت الخشامة

وأذقنا من الكي ألواناً

أنست فيك قداسة ... اشراقاً و فناً

ياخ أريتنا بي حالكم ..... سكرة لامن تخلي الزول يحبى

صباحاتك ..........

ألف تحية أيها السامق

حاتمووووف ,,

بيلاي ادونا جوغمـــة كبيرة كدا
عشان نعيش في الوهمـــة -
شــرابكم دا بلدي ولا مســـــتورد ؟؟؟؟؟

متابعين حتى الثمالــــــة ,,

كن طاشي شبكه ومتعنا ,,,

شايفين شايفين كيف

القناة دي صرفت لينا كوكو من نقاش الملحد التافه

وخلتو ود عبد المجيد يكوس في البستله بتاعتو




عشان تاني تقولو انا غلطان


لكن السواها حاتم شديدة

دي زي ما بقولوا احنا نشرب وانتو تسكرو


عند حاتم: احنا نكتب وانتو تسكرو

اقتباس: المشاركة الأصلية كتبت بواسطة أحمد ابن عوف     لكن لو اصلها قناة السجم دي ما بتلم الا ناس السجم الحلوين زي ناس حاتم فما عندنا مانع انها تواصل في شغل اولاد الشوارع

آآي كده بالله..
خلي لينا النيل الأزرق والشارع.. وتاني شووت في أي اتجاه شوف لو نقول ليك حاجة..

اقتباس: المشاركة الأصلية كتبت بواسطة koko123     سقاك ربك شراباً طهوراً

وإياك يا حبيبنا, شربة كده, لا نظمأ بعدها أبدا, قول آمين..

اقتباس: المشاركة الأصلية كتبت بواسطة koko123     ياخ أريتنا بي حالكم ..... سكرة لامن تخلي الزول يحبى

و"قريب منك" إن شاء الله, بتشوف الدنيا بنظارة وردية كده, ومرات بتكون حمرا عدييل والله..

اقتباس: المشاركة الأصلية كتبت بواسطة محمد عبد المجيد     شــرابكم دا بلدي ولا مســـــتورد ؟؟؟؟؟

مولانا ابن عبد المجيد
ده بلدي ساااي, لكن لو عايز المستورد "النضيف" عليك ببوب مارلي ومارسيل خليفة.. وصدقني ما حتندم..

ثم أطلت علينا "شروق" أو "طليعة الجيل المتمرد"!
وغنت أغنية من العيار الثقيل, "يا المصيرك تنجرح" ,لشيخنا الطيب عبدالله,رد الله غربته!
وأعطيها أجر الاجتهاد كاملا, فليس سهلا علي الإطلاق ,أن تغني بعد شيخنا!
ولله در شاعرها, أهو "الحلنقي" أم تراه "مدني"?
أظن أن هذا "الفرح" قد خامر عقولنا فما عدنا نميز بين الطيب والطيب!!
غفر الله لهما وأمد في عمريهما, فلطالما شاركانا في "القعدات" الأدبية!

وأشهد هنا أنني ما وجدت من يحب "إسحاق" كما يحبه صديقنا "صلاح مولانا",حني أنه في غمرة هذا الحب السامي, قد قام بترجمة جُل ما كتبه أستاذنا إلي إنجليزية رصينة, لا تخلو من بلاغة أعجمية مبينة!
فك الله أسره وجمعنا به في أرض الأعاجم, قولوا آمين!

وأستميحكم عذرا الآن.. فأنا عازم أن أقع في تلك البحيرة المعتقة.. وأن أشرب من خمرها .. حتي يستبين النقص منها!
والبحيرة اسمها "التومات" ,والقائم بأمرها هو شيخنا "السني الضوي", أمد الله في أيامه, ورحم فردته "إبراهيم أبودية" ..
وعندما يكون الحديث حول التومات, فإن العبد الفقير "الطاشم", لا يتمالك نفسه, ويقوم - عامدا متعمدا - بكسر كلتا ركبتيه!!

ولو أنه رمح إذا لاتقيته.. لكنه رمح وثان وثالث!

فما ظنك - يا رعاك الله - بأربعة رماح مصلته, إيمان وأماني وشيخنا, ومن خلفهم" عوض أحمودي" !
وقد ورد أن مولانا أبو نواس قد دخل ,ورفقة له, حانة مجوسي, عازمين علي المكوث بها بضع ساعات, فما خرجوا إلا بعد أسبوع ونيف!!
وهذا عين ما حدث معي.. فقد دخلت حضرة المذكورين أعلاه,, وما خرجت إلا والشمس تؤذن بالمغيب!!

ولشيخنا السني, قدرة مذهلة علي استخراج الألحان الخفيفة الرشيقة الأنيقة.. إما إذا كانت الكلمات لـ د.علي شبيكة.. فما علي سلطان الطرب إلا أن يأمر فيُطاع!
ولو لم يكن بالتوأم شيء من حتى, لما تبناهما شيخنا, ولما منحهما إرثا.. كنا - والله - نخشى عليه الضياع, بعد أن توسد أبي دية الباردة.. يرحمه الله..
ولكنني في كامل طمأنينتي الآن.. فلقد استمعت -ساعة ضيق- لــ :
والله وحدوا بينا.. البرحونا وراحوا
شالوا من وادينا.. بهجته وأفراحو
بالكتير ياحليلم.. ياحليل الراحو

فخرجت من حال إلي حال, وتيقنت أن الثنائي لم يمت , بل "حل" في الصبيتين, و "الحلول" هو من بعض شطحات الصوفية!
وأهل المغني لهم في تصوفهم مقامات, لا يدركها الإنسان العادي!
وهي مما لا يُصَرح به, فعذرا!!

ولا يفوتني هنا أن أقول أن مفردة "حليل", لا توجد لها ترجمة ,في كل اللغات المعروفة, حية كانت,أو ميتة, فتأمل..!


ثم استمعت لصبي يدعي محمد بدوي, فذهلت!
كيف لصبي في مثل هذه السن, أن يغني لعملاقنا "أبي عفان"!
ولقد غني - لله أبوه - وغني وغني .. حتى رأيت العيون تترقرق بالدموع, والرؤوس تنكفئ علي المناضد!

مسامحك يا حبيبي.. مهما قسيت علي
قلبك عارفو طيب.. وكلك حسن نية

وتمنيت والله لو شدا برائعة مولانا با زرعه:

بالمعزة..
بالمودة البينا.
بي أغلي الصلات..
بي الهوى..
العشناه بي أعصابنا خمسة سنين..
ومات..
أستحلفك أترك سبيلي..
وسيبني وحدي..
أقاسي مر الذكريات..


هذا علي خشيتي من أن "يُعوَقني" بها ..وأنا رجل مكلوم مصاب:

وكنت إذا أصابتني سهام.. تكسرت النصال علي النصال!!

ثم إننا نمنا ليلتنا تلك علي "سكر", وأصبحنا "مشعشعين" و "ملطمين".. فهرعنا للشاي الصاموطي, ومن غيره, لصياغة الرأس وترتيب المزاج!!
وبعد أن خَف الأثر , و"فتَحنا" شوية,, قررنا إعادة ذات البرنامج, ولكن بتنميق أكثر!!
وبدأناه مبكرا جدا.. وتطوَعت لإعداد "حله الجكن الما خمج", والتي أؤكد, وبكل تواضع ونكران ذات, أن لو كان شيخ المغنيين, إسحاق الموصلي حيا, لما تردد لحظة في الغناء لها!
وبدأنا بـ رفيعة .." تغيرت أسماء البنات كثيرا في السودان",,
وصوتها عادي, ولكنها ترنمت بأغنية جميلة جميلة, والأغنية لـ ذكي عبد الكريم:

أسأل نفسك بينك وبينا عن إخلاصنا
كيف تتجاهل شوقنا البينا
إنت نسيت أيام ما كنا نعيش الحب في عهدو الأول
ياما كتير وكتير فكرنا وكنا بنحلم بالمستقبل
لكن إنت بديت تتغير وعن ريدتنا بقيت ما بتسأل
قلبك رغم الطيبة الفيهو أنا بستغرب كيف يتبدل
فاكر الكلمة القلتها ليا وإنتا في لحظة هنية سعيدة
وإتعاهدنا علي الحنية نقضي عمرنا محبة شديدة
كنت بريدك زي عينيا وأنا صدقت كلام الريدة
عارفو قلبك وافي ومخلص وإنك تقسا دي حاجة بعيدة


غفر الله لها,, فقد أعادتنا لسابق عهدنا, سكارى..
وهل رأي الحب سكارى مثلنا!!

ولا أذكر كيف ولم, ولكنني فجأة, وجدتني منخرطا مع "الندامى" في نقاش "بيزنطي" عن الزواج.. وعن أنسب النساء للارتباط بـ "صعاليك" مثلنا..
والصعاليك هم مجموعة بشرية تتميز بنمط حياة مختلف, وقد ظهروا أول ما ظهروا في جاهلية ما قبل الإسلام, ومن أشهر الصعاليك, تأبط شرا, والشنفري, الذي كان يسبق الخيول عدوا علي قدميه,,
وبعد جدل كبير, فازت بنات "البلد التي تحبنا ونحبها والتي بها ملك لا يُظلم عنده أحد" بالأغلبية الساحقة, وليس بالإجماع "السكوتي", حني لا تظنون بنا الظنونا!

وفي غضون هذا النقاش, كان بعض "الأولاد المقلدين" قد مضوا لحال سبيلهم, كيف أصبح كل المغنين نسخة من محمود وفرفور?!
ليتهم يعلمون أن لنا رأيا في "النسخة الأصلية" نفسها, فما بالك بالـ copy !!

وغني ولد الماحي سليمان, فلعنت في سري ألف مرة ,"فيتامين واو", الذي أعادنا ألف سنة للوراء!
علي كل حال:
يا نديمي دعك من عثرات قولي
وأترع الكأس تناجي الكون مثلي

ثم أضاءت الشاشة بمقدم "عافية", وعند عافية, يبتدئ الطرب, ونسترد شيئا من عافيتنا, بل كل عافيتنا,, ورحت أبحث عن "رُكبي" كي أكسرها هنا, فوجدتني قد كسرتهن already في حضرة التومات, فأشفقت علي قلبي:

مين علمك تهوي الجمال
يا قلبي وأستلمك
العلمك ظلمك

ولولا خشيتي أن أشتط في الحكم, لوضعتكن, يا بنات السودان, في صف واحد مع "الجماعة", ولحملَتكم جميعا, المسئولية كاملة, ولكن...

شلناك غنا يا أجمل مني
إنشاء الله في عشة هانية
فرحة تلمنا
شايلين المحنة همنا نبني جنة
جنة تلمنا


لأجل عافية, فإن العبد الفقير "الطاشم" يتنازل عن كامل حقوقه, ويغفر لكل من أذته, ومن ستؤذيه, فيما تبقي له من عمر, ولسان حاله يقول, كما قال "أبو الزيد" :

تغلطوا إنتو يا حلوين.. نجيكم نحن بالأعذار!!

أو كما قال "كثير" :

هنيئا مريئا غير داء مخامر.. لـ "عزة" من أعراضنا ما استحلت!

وأخبرنا أحد "الطشامي" أن "عافية الترد العافية" ,قد أحيت عدة حفلات في أمريكا..
"دعواتكم للعبد الطاشم يكتل ليها حفلة كده في بروكلين"
آمين!!




وهذا ما كان من أمرنا في العطلة الأخيرة..
ولا يفوتنا أن نشكر أخونا "عبد العظيم الجلم" ببنغازي, سوق الحديقة, وإستديو أفريقيا بنفس العنوان, وأستديو السودان بالسوق الشعبي أمدرمان, وكل من فاتنا ذكره من قراصنة التسجيلات, فلولاكم, يامن تطاردكم الشرطة بدأب وحرص, لولاكم, لما اشتعلت أيامنا "قمحا ووعدا وتمني"
فليحفظكم الله من أعين الكلاب البوليسية المترصدة,,
وشكرا, أصالة عن نفسي, ونيابة عن كل المغتربين, المهاجرين, المشردين واللاجئين,,في كل ركن وكل بقعة من بقاع هذا العالم الواسع..

ومررت علي الديار ديار ليلي.. أقبل ذا الجدار وذا الجدارا
وما حب الديار شغفن قلبي.. ولكن حب من سكن الديارا

ثم نستغفر الله..

ونعتذر "للناس المهذبة" التي ليس لها "في البتاع ده", ونقول كما قال "واحد إنسان" :

وللحلم أوقات وللجهل مثلها.. ولكن أوقاتي إلي الحلم أقرب!





تمتَ "القعدة" بحمد الله في ليالي شتوية طويلة, بالجزء الشرقَي الأقصى من الكرة الأرضية..

لسه بدري يا (زومول)

يا دوبك (شعشعنا) ؟؟؟؟؟

ألف تحية يا صاحبي

و شكراً على هذا الجمال و المتعة

أكيد (جعبتك) .... لا تخلو من الفن (ما تفهمني غلت)

و زي ما قيل ( بيت الذئب لا يخلو من العظم)

تحياتي

اقتباس: المشاركة الأصلية كتبت بواسطة koko123     أكيد (جعبتك) .... لا تخلو من الفن (ما تفهمني غلت) و زي ما قيل ( بيت الذئب لا يخلو من العظم) تحياتي

ما مشكلة ياخ, نحاول نفهمك صاح..



المشكلة الكبيرة البعاني منها هسا إنو "أصدقاء السوء" ديل انقرضوا من وجه الأرض ياخ..
الواحد عدم الزول "يقعد" معاهو ساااي..
تخيل؟

وفي احتمال تاني, إنو أخوك يكون بقا "صديق طيب" وكده..
ودي تبقا مصيبة ياخ..